Выпускнік Акадэміі МУС загінуў у ДТЗ на праспекце Пераможцаў

Сталі вядомыя падрабязнасці аварыі, якая адбылася ў Менску некалькі дзён таму.

Па словах відавочцаў, у канцы праспекта Пераможцаў сутыкнуліся Peugeot 3008 і матацыкл. Кіроўца другога транспартнага сродку памёр на месцы здарэння, піша onliner.by.

«Моцік валяецца і куча аскепкаў ад машын. 2 машыны гаёвых ужо стаяць», - напісаў адзін з відавочцаў здарэння (тут і далей арфаграфія і пунктуацыя захаваныя).

Па словах іншага сведкі аварыі, яна здарылася на скрыжаванні праспекта Пераможцаў і вуліцы Ржавецкай.

«Праяжджаў міма, хуткая як раз пад'язджала, ДАІ яшчэ не было нават. Ляжаў на асфальце хтосьці, побач - шлем. На другім баку праспекта прыпаркаваны дзесятак спорт-байкаў. Хвілін 15 да гэтага седзячы на запраўцы UC чуў рык байкаў, якія носяцца туды-сюды», - паведаміў ён.

Інфармацыю папярэдне пацвердзілі ў ДАІ. Кіроўцы ехалі насустрач адзін аднаму. Аўтамабіль стаў разгортвацца, потым адбылося сутыкненне.

«За рулём Peugeot знаходзіўся малады мужчына (1985 года нараджэння). Ён рухаўся па праспекце Пераможцаў (з боку вуліцы Нарачанскай ў напрамку МКАД). На скрыжаванні з вуліцай Ржавецкай ён здзяйсняў разварот, і адбылося сутыкненне з Suzuki GSX750 FK1. Ім кіраваў менчук 1985 года нараджэння», - распавяла кіраўнік прэс-службы Менскай ДАІ Таццяна Харлінская.

Кіроўца Peugeot запэўнівае, што аварыя адбылася па віне матацыкліста.

«Я здзяйсняў разварот на скрыжаванні з вуліцай Ржавецкай на зялёны сігнал святлафора. Прапусціўшы пры гэтым 5-6 сустрэчных машын здзейсніў разварот і ўжо рухаўся ў адваротны бок і толькі праз секунд 10 я ўбачыў у люстэрка задняга віду яркае святло далёкага», - кажа ён. Пасля гэтага адбылося сутыкненне. Кіроўца Peugeot піша, што пасля яго машына, якая важыць каля двух тон, апынулася на раздзяляльнай паласе. Удар прыйшоўся ў яе заднюю частку.

Аварыя шырока абмяркоўваецца ў інтэрнэце. Карыстальнікі сацыяльных сетак змаглі ўстанавіць асобу загінулага. Ім, па іх словах, апынуўся Аляксей Чарвякоў, які ў 2009 годзе скончыў Акадэмію МУС. Чытачы форумаў не выключаюць, што ён мог быць супрацоўнікам ДАІ.

Таццяна Харлінская ўдакладніла, што кіроўца Peugeot быў цвярозы, дакументы ў яго ў парадку. Па факце ДТЗ распачатая крымінальная справа. Хуткасць кіроўцы Suzuki будзе ўстаноўленая падчас следства. Між тым з пачатку года ў Менску, у тым ліку ў апошнім выпадку, загінулі тры матацыкліста, двое з якіх - на МКАД.