Справа аб знікненні Захаранкі падоўжаная на тры месяцы

СК у чарговы раз падоўжыў справу аб знікненні апазіцыйнага палітыка.

Пра гэта сайту charter97.org паведаміў кіраўнік «Прававой дапамогі насельніцтву», былы следчы пракуратуры Алег Волчак.

«Атрымаў ліст са Следчага камітэта, што зноў справа аб знікненні Юрыя Захаранкі падоўжаная на тры месяцы - да 24 снежня 2013 года. Адказ стандартны. Але я хацеў бы звярнуць увагу на пратакол допыту па гэтай справе фотакарэспандэнта Уладзіміра Кармілкіна», - сказаў юрыст.

Праваабаронца дадаў, што атрымаў гэты пратакол прыкладна пяць гадоў таму, але, тым не менш, ён выклікае вялікую цікавасць.

«З яго вынікае, што Юрый Мікалаевіч заязджаў да гэтага журналіста літаральна за дзве-тры гадзіны да знікнення. Генерал выказваў сваю занепакоенасць, некалькі разоў падыходзіў да акна і казаў, што за ім сочаць. На наступную раніцу Кармілкін даведаўся, што Захаранка знік, з'ездзіў на месца здарэння і зрабіў здымкі. Машына Юрыя Мікалаевіча была на месцы, а яго самога няма. Сведка пацвердзіў, што за генералам сапраўды вялася сочка, і знік ён не выпадкова. Варта адзначыць, што справа спачатку вяла следчы Святлана Байкова, якую потым асудзілі за злоўжыванне ўладай», - падкрэсліў Алег Волчак.

Нагадаем, генерал Юрый Захаранка бясследна знік 7 траўня 1999 года. Паводле афіцыйнай версіі, гэта здарылася ўвечары ў раёне вуліцы Жукоўскага ў Менску, калі ён быў выкрадзены з ужываннем гвалту «неўстаноўленымі асобамі» і вывезены на легкавым аўтамабілі ў невядомым кірунку. Па факце знікнення экс-міністра ўнутраных спраў крымінальная справа была ўзбуджаная толькі 17 верасня 1999 года па прыкметах злачынства, прадугледжанага артыкулам 101 Крымінальнага кодэкса. Сведкі выкрадання, якія былі знойдзеныя не следчымі органамі, а грамадскай камісіяй па пошуку зніклага генерала, сцвярджаюць, што Захаранка быў гвалтоўна вывезены некалькімі мужчынамі.

Шмат хто ў Беларусі і ў свеце лічаць, што яго выкралі па палітычных прычынах і, магчыма, забілі. Беларускія ўлады заяўляюць, што следства яшчэ не завершанае і прычыны выкрадання Захаранкі, як і яго лёс, невядомыя.