Беларусы ўкладваюцца ў латвійскую нерухомасць
19- 9.10.2013, 15:21
- 15,697
Беларусь займае чацвёртае месца сярод краін СНД па ліку фізічных асоб, якія інвестуюць у аб'екты нерухомасці ў Латвіі.
DTZ-Baltics і яе партнёр у Беларусі - кампанія EnterInvest - правялі даследаванне ўдзелу інвестараў з СНД у набыцці нерухомасці ў Латвіі. Згодна з аглядам, у якім выкарыстоўваліся дадзеныя Дзяржаўнай зямельнай службай Латвіі, Беларусь уваходзіць у пяцёрку краін па агульнай колькасці фізічных асоб, якія ўкладваюць сродкі ў куплю латвійскай нерухомасці. Асноўная цікавасць беларускіх інвестараў засяроджаная на жылой уласнасці, размешчанай у добрых раёнах найбуйнейшых гарадоў.
Прадстаўнікі Беларусі набываюць нерухомасць у Латвіі шмат у чым у разліку на атрыманне віду на жыхарства. Так, у перыяд з 2010 года па травень 2013 Беларусь заняла чацвёртае месца па колькасці заявак на від на жыхарства: Расея - 4,573 заявы, Украіна - 489, Казахстан - 331, Беларусь - 158, іншыя краіны СНД - 358, і гэтак далей.
Самы значны паток прамых замежных інвестыцый (амаль 90%) прыпадае на нерухомасць у цэнтры Рыгі і Юрмалы, асабліва высокая цікавасць да сучаснага жылога будаўніцтва.
Статыстыка паказвае на тое, што цікавасць замежных інвестараў да прыбалтыйскай нерухомасці дэманструе ўстойлівы рост у апошнія гады. Па папярэдніх прагнозах да канца 2013 года агульная колькасць здзелак з удзелам інвестараў дасягне 1300. Грашовы абарот складзе 250 мільёнаў еўра. Для параўнання, у 2010 годзе было заключана 79 здзелак, у 2011 - 609, у 2012 - 1, 012.
Агульны грашовы абарот за 2010-2013 гады мяркуецца, складзе 600 мільёнаў еўра, а агульная колькасць здзелак дасягне 3000, з якіх каля 56% прыпадае на Рыгу, 30% - на Юрмалу.
Важна адзначыць, што ў часы эканамічнага спаду ў Латвіі нямала праектаў у сектары жылога будаўніцтва было прыпынена. Менавіта замежныя пакупнікі сталі тым драйверам, які «ажывіў» сектар жылой нерухомасці ў Прыбалтыцы. На працягу апошніх трох гадоў попыт на кватэры ў Рызе і Юрмале паказаў такі рост, што сёння многія з аб'ектаў ужо на стадыі праектавання распрацоўваюцца з улікам патрабаванняў замежных пакупнікоў.
