МАЗ можа канчаткова страціць расейскі рынак

Разгрузка складоў не ўратуе беларускі экспарт.

Такое меркаванне выказаў эканаміст Антон Балтачко, каментуючы сайту charter97.org прызначэнне беларускім кіраўніком вінаватых у неліквідах на складах чыноўнікаў урада.

«Любы тавар можна прадаць. Пытанне толькі ў тым, якая зніжка будзе на яго. На сённяшні дзень мы бачым, што на складах назапасілася каля 30 трыльёнаў рублёў. Вядома ж, гэта досыць вялікая сума, і, як мы бачым, на сённяшні дзень продажы не ідуць. Плюс да гэтага трэба ўлічваць, што калі мы ацэньваем склады, то робіцца гэта яшчэ зыходзячы з таго, што ў годзе ёсць сезоны росту і падзення продажаў. А сезон росту продажаў скончыўся ў верасні месяцы. Як мы бачым, склады ўсё ж такі не разгрузіліся. Адпаведна, тыя тры месяцы, што засталіся, - гэта так званы перыяд нестабільнасці ў дачыненні да складоў. І калі яны не былі разгружаныя ў сезон продажаў, то зараз яны могуць быць разгружаныя, толькі калі ёсць нейкі дысконт», - лічыць эканаміст.

Эксперт адзначыў, што беларуская эканоміка страціць дастаткова вялікія грошы, але гэта лепш, чым нічога.

«Пытанне ў тым, хто гэта можа зрабіць, і ці будзе гэта на самой справе зроблена. Мы бачым, што чыноўнікі пакуль што не спраўляюцца з разгрузкай складоў, а маркетынгавыя аддзелы дзяржаўных прадпрыемстваў проста не здольныя прадаваць, але здольныя прыдумляць нейкія мадэлі вывазу ў гандлёвыя дамы, адтэрміноўкі плацяжоў і таму падобнае. Гэта фактычна адцягвае на нейкі тэрмін праблему, але не вырашае яе», - упэўнены Антон Балтачко.

Эксперт дадаў, што гэта робіцца па зразумелых прычынах - многія хочуць пасядзець у крэсле даўжэй, не думаючы пра тое, што будзе пасля таго, як яны сыдуць з пасады.

«У Беларусі праблема складоў вельмі добра карэлюецца з той жа дэбіторскай запазычанасцю. Гэта значыць фактычна гэта стандартная мадэль працы на склад, калі даюць больш грошай, стымулююць эканоміку і потым спрабуюць збываць прадукцыю з дапамогай росту запазычанасці. Гэта значыць фактычна збываць у пазыку. Потым пэўная прадукцыя ўсё ж неяк збываецца, але гэта не вырашае галоўнай праблемы - незапатрабаванасці нашай прадукцыі на знешніх рынках. Таму што Расея на сённяшні дзень мае магчымасць у рамках СГА ўвозіць больш танныя і якасныя тавары. І яркім прыкладам можа стаць страта долі на расейскім рынку нашым МАЗам, які значна асеў з пачатку гэтага года, так як з'явілася канкурэнцыя з боку некаторых замежных кампаній, якія цяпер маюць магчымасць завозіць сваю прадукцыю на тэрыторыю Расейскай Федэрацыі», - падкрэсліў Антон Балтачко.

Нагадаем, сёння на нарадзе па бягучых пытаннях сацыяльна-эканамічнага развіцця Лукашэнка абвінаваціў міністраў і кіраўнікоў прадпрыемстваў у хлусні і прыгразіў крымінальнай адказнасцю.