Саладуха: «Падатак на дармаедства? Ён мне падабаецца!»

Спявак лічыць падатак на беспрацоўных добрай ініцыятывай уладаў.

Пад уражаннем ад прагляду прома-роліка, у якім Аляксандр Саладуха заклікае артыстаў запісвацца на нацыянальны адборачны тур «Еўрабачання», «Салідарнасць» патэлефанавала спеваку, каб абмеркаваць надзённыя пытанні.

Не бяда, што зорка не адказала на званок. Праз некалькі хвілін зазваніў тэлефон, і слухаўка загаварыла голасам выканаўцы хіта усіх часоў і народаў «Здравствуй, чужая милая».

- У мяне ваш прапушчаны выклік, - патлумачыў Саладуха.

- Так-так, я вам тэлефанавала! Скажыце, Аляксандр, каго б вы самі адправілі на «Еўрабачанне»?

- Трэба паглядзець усе заяўкі.

- Але пакуль ідзе прыём заявак, падзяліцеся, хто з выканаўцаў, па-вашаму, варты прадстаўляць Беларусь на гэтым конкурсе?

- А ваша меркаванне, хто павінен ад краіны ехаць?

- Я думаю, вы. Ваш выступ запомніoўся бы сапраўды ўсім.

- Вось вы і адгадалі! Я прашу прабачэння, мне трэба тэрмінова есці і з'язджаць. У мяне здымкі на «Беларусь-1».

- Аляксандр, літаральна пару хвілін. Так вы прынялі рашэнне ці будзеце ўдзельнічаць у адборы на «Еўрабачанне»?

- Пажывем-пабачым. Тэрміны церпяць. 18 лістапада ў 7.30 глядзіце мяне ў прамым эфіры. Пакажуць яшчэ другі ролік.

- Вашы прыхільнікі і блізкія людзі кажуць вам: «Саша, ды едзь ты туды!»?

- Мне кожны дзень пра гэта кажа ўся краіна на працягу некалькіх гадоў.

- А чаму вы супраціўляецеся?

- А хто сказаў, што я супраціўляюся? Яшчэ не вечар.

- Аляксандр, вы такі запатрабаваны артыст. Раскажыце пра вашы планы на Новы год?

- 14 снежня працую з Яраславам Еўдакімавым у Растоўскай вобласці. 28 снежня працую ў Санкт-Пецярбургу, у адным з гатэляў гуляе адна кампанія. На Новы год пакуль не было заказаў.

У мяне «Менск-Арэна» 8 сакавіка 2014 года - прэзентацыя альбома «Верное сердце». І ў студзені дзве пяцёркі - грандыёзная дата. Столькі падзей - вы не ўяўляеце! Проста снежны ком ідзе - падзеі, запрашэнні, здымкі. (Смяецца).

А запрашэнне ад «Белтэлерадыёкампаніі» забіла напавал. Усё кіраўніцтва БТ прыняло рашэнне, каб галоўным героем прома-ролікаў, якія заклікаюць запісвацца на «Еўрабачанне», быў Саладуха, таму што яго ведае ўся краіна. Мне гэта вельмі спадабалася.

Вы ж ведаеце, у ноч з 18 на 19 кастрычніка тэлеканал БелМузТВ мне ўручыў прэмію «Прызнанне пакалення». Вы ж у курсе, так? Гэта таксама было вельмі прыемна. Кажуць, мяне ведае старэйшае пакаленне і паважае моладзь. Гэта першая такая прэмія ў гісторыі Беларусі.

- Аляксандр, вас уся краіна ведае як працаголіка...

- 28 гадзін у суткі працую, так... Вось пакуль з вамі размаўляю, тэлефануе другі тэлефон. Толькі што даваў інтэрв'ю аднаму выданню, а зараз нехта трэці прарываецца. А ў мяне галубцы стынуць...

- У мяне апошняе пытанне. У Беларусі збіраюцца ўвесці падатак на дармаедства...

- Ды вы што! - перабівае здзіўлены Саладуха. - Упершыню пра гэта чую. Але мне ён падабаецца. Калі чалавек працуе, тады ён ідзе. Жыццё дадзена кожнаму адзін раз ад Госпада Бога. Трэба пакараць вяршыні, трэба ісці, як бы ні было цяжка. Так цікава, разумееце, дарыць людзям радасць, прыносіць карысць грамадству, блізкім. Гэта вельмі важна. Усміхайцеся і ніколі не здавайцеся! Так напісана ў дзевятым альбоме ў Сашы Саладухі - унутры, у вокладцы. Толькі наперад і ўверх! Таму гэта добрая ініцыятыва. Я падтрымліваю дзяржаву.