Мінчукі заступіліся за ўдзельніка акцыі «Стоп падатак»
61- 21.12.2013, 9:55
- 76,960
Міліцыя затрымала кіроўцу аўтамабіля ў цэнтры Менска.
Ён заблакаваў рух на скрыжаванні вуліцы Янкі Купалы і праспекта Незалежнасці. Адзін з удзельнікаў акцыі супраць увядзення пошлін на аўтатранспарт спыніў сваю машыну на з'ездзе з праспекта на вуліцу Купалы каля будынка цырка, заблакаваўшы рух транспарту, у прыватнасці, аўтобуса №57, піша БелаПАН.
Супрацоўнікі ДАІ патрабавалі вызваліць праезд і адагнаць машыну, аднак кіроўца працягваў стаяць з уключанай аварыйнай сігналізацыяй. Супрацоўнікі патрульна-паставой службы выклікалі нарад міліцыі.
Міліцыянты затрымалі пасажыра аўтамабіля. З ужываннем сілы яго зацягнулі ў міліцэйскі аўтамабіль. Кіроўцу прапанавалі адагнаць аўтамабіль. Ён сеў за руль, зачыніўся ў машыне і працягваў сігналіць. Міліцыянты некалькі хвілін беспаспяхова спрабавалі адкрыць аўтамабіль. За яго заступіліся некалькі мінакоў. У выніку кіроўцу ўсё ж дасталі з машыны і таксама сілай запіхнулі ў міліцэйскі ўазік. Затрыманне суправаджалася крыкамі «За што?». Пры гэтым распараджэнні міліцыянтам і супрацоўнікам ДАІ падчас затрымання аддавалі людзі ў цывільным.
Апусцелая машына была эвакуяваная.
Акцыя «Стоп падатак» супраць ўвядзення пошліны на аўто прайшла ўчора ў многіх гарадах Беларусі. Самай шматлікай яна была ў Менску. Сталічныя аўтамабілісты спынілі рух па праспекце Незалежнасці амаль на гадзіну. Акцыю падтрымалі сотні мінакоў.