Беларускія кошты на бензін абагналі расейскія

Сярэднія кошты на бензін у Беларусі ўпершыню за многія гады сталі вышэй, чым у 50 з 82 расейскіх рэгіянальных цэнтраў.

Па курсе Нацбанка Беларусі на 5 снежня літр АІ-92 каштаваў у Беларусі 29,73 расейскага рубля, АІ-95 - 32,92 расейскага рубля. Па дадзеных Расстата на 2 снежня, сярэдні кошт літра АІ-92 у Расеі дасягаў 29,67 расейскага рубля, АІ-95 - 32,74 расейскага рубля, піша «Завтра твоей страны».

У пачатку снежня кошт на бензін у Беларусі быў вышэй, чым у большасці рэгіянальных цэнтраў суседняй краіны. У пералік увайшлі паўсотні гарадоў і рэгіёнаў Расеі, уключаючы Белгарад, Бранск, Уладзімір, Іванава, Калугу, Кастраму, Курск, Ліпецк, Маскоўскую вобласць, Арол, Разань, Смаленск, Тамбоў, Цвер, Тулу, Яраслаўль, Петразаводск, Сыктыўкар, Архангельск, Ленінградскую вобласць, Санкт-Пецярбург, Майкоп, Астрахань, Валгаград, Растоў-на-Доне, Уладзікаўказ, Уфу, Йошкар-Алу, Саранск, Казань, Іжэўск, Чэбаксары, Перм, Кіраў, Ніжні Ноўгарад, Арэнбург, Пензу, Самару, Саратаў, Ульянаўск, Курган, Екацярынбург, Чэлябінск, Горна-Алтайск, Абакан, Барнаул, Краснаярск, Кемерава, Новасібірск, Омск і Томск.

Самы нізкі кошт за літр бензіну АІ-92, па дадзеных Расстата, быў у Белгарадзе (28,19 расейскага рубля), на АІ-95 - у Кемерава (30,94 расейскага рубля).

У параўнанні яшчэ з 12 рэгіёнамі ў Беларусі вышэй кошты на тую ці іншую марку бензіну. Так, кошт АІ-92 у Беларусі ў пачатку снежня быў вышэй, чым у Варонежы, Вялікім Ноўгарадзе, Пскове, Краснадары, Стаўрапалі, Нальчыку і Чаркеску. Але мясцовыя аўтааматары плацілі менш, чым у Беларусі, за АІ-95.

Па кошту літра АІ-95 Беларусь апярэдзіла Элісту, Махачкалу, Назрань, Грозны і адну з расейскіх нафтавых сталіц - Цюмень (літр АІ-95 тут 2 снежня каштаваў 32,35 расейскага рубля). Але кошт на 92-і ў гэтых гарадах былі больш, чым у Беларусі.

Пакуль кошты на бензін АІ-92 і АІ-95 вышэй, чым у Беларусі, у 20 расейскіх рэгіёнах. Гэта - Масква (у расейскай сталіцы АІ-92 каштуе 30,02, а АІ-95 - 33,26 рубля), Нар’ян-Мар, Волагда, Калінінград, Мурманск, Ханты-Мансійск, Салехард, Улан-Удэ, Кызыл, Чыта, Іркуцк, Якуцк, Петрапаўлаўск-Камчацкі, Уладзівасток, Хабараўск, Благавешчанск, Магадан, Паўднёва-Сахалінск, Бірабіджан і Анадыр. У Анадыры самыя высокія ў Расеі кошты на АІ-92 (47 рублёў за літр) і АІ-95 (49 рублёў).

«Белнафтахім» павялічыў адпускныя рознічныя кошты на паліва ў сярэднім на 2%, спасылаючыся на змяненне курсу беларускага рубля ў адносінах да асноўных сусветных валют. У канцы мінулага тыдня, 5 снежня, кошт бензіну АІ-92 склаў 8400 беларускіх рублёў, АІ-95 - 9300 беларускіх рублёў.

Гэта ўжо чацвёртае павышэнне кошту паліва ў Беларусі з пачатку бягучага года. Папярэдняе адбылося 17 верасня, калі рознічныя кошты на бензін і дызельнае паліва, якія рэалізуюцца праз АЗС, павялічыліся ў сярэднім на 8 адсоткаў. Перагляд коштаў быў зроблены ў мэтах кампенсацыі павелічэння ставак акцызаў на аўтамабільныя бензіны.

3 верасня бягучага года «Белнафтахім» падняў кошты на 5%, аргументуючы гэты крок неабходнасцю кампенсацыі акцызаў на бензін і дызельнае паліва, якія былі павялічаныя на 45 і 70% адпаведна з 28 жніўня. На той момант кошт бензіну маркі АІ-92 вырас да 7700 беларускіх рублёў (28,4 расейскага рубля), а АІ-95 - 8300 тыс. рублёў (30,6 расейскага рубля).

Да таго ў сярэднім на 5% былі павышаныя рознічныя кошты на аўтамабільныя бензіны і дызельнае паліва 16 студзеня.