У метро з'явяцца новыя комплексы для ператрусу пасажыраў

Новыя комплексы для надгляду пасажыраў абсталююць на станцыі «Купалаўскай» і на другім выхадзе станцыі «Кастрычніцкай».

Пра гэта паведаміў сёння на прэс-канферэнцыі галоўны рэвізор па бяспецы КУП «Менскі метрапалітэн» Аляксандр Салей, піша onliner.by.

Спецыяліст адзначыў, што на сёння ў метро дзейнічаюць два надглядальных комплексы: на станцыях «Кастрычніцкая» і «Пятроўшчына».

Сёння ў менскім метро працуюць 930 камер відэаназірання, якія сочаць за пасажырамі ад уваходных дзвярэй да пасадкі ў цягніка. У мінулым годзе відэакамеры ўсталявалі ў сямі вагонах Маскоўскай лініі метро. У 2013 годзе цягнікі працягнуць абсталёўваць сістэмамі назірання.