Бізнес пратэстуе супраць павелічэння базавай арэнднай велічыні

Бізнес-супольнасць будзе дабівацца перагляду пастановы ўрада аб павелічэнні базавай арэнднай велічыні.

Пра гэта сёння паведаміў журналістам падчас анлайн-брыфінгу старшыня прэзідыума Рэспубліканскай канфедэрацыі прадпрымальніцтва Уладзімір Карагін, пішуць «Бизнес-Новости».

Ён нагадаў, што з 1 красавіка 2013 года базавая арэндная велічыня ў Беларусі павялічыцца c BYR 54 тыс. да BYR 86 тыс. Такое рашэнне змяшчаецца ў пастанове Савета міністраў ад 13 сакавіка 2013 года № 172. «Але гэты дакумент не быў узгоднены з бізнес-супольнасцю», - адзначыў Карагін.

Пры гэтым ён падкрэсліў, што рашэнне аб павелічэнні базавай арэнднай стаўкі прынята ў адпаведнасці з заканадаўствам.

Нагадаем, па ўказу Лукашэнкі № 150 ад 29 сакавіка 2012 года «Аб некаторых пытаннях арэнды і бязвыплатнага карыстання маёмасцю» памер базавай арэнднай велічыні штогод устанаўліваецца Саўмінам з улікам змянення індэкса спажывецкіх коштаў за папярэдні год ў параўнанні з папярэднім і ўжываецца з 1 красавіка года, у якім ён устаноўлены. Паводле звестак Белстата, сярэднегадавы індэкс спажывецкіх коштаў у 2012 годзе ў адносінах да 2011 годзе склаў 159,2%.

«Але ў дадзеным выпадку нельга фармальна прытрымлівацца заканадаўства. Рашэнне аб павелічэнні базавай арэнднай стаўкі трэба было прымаць з улікам шэрагу абставінаў і ўвесці, напрыклад, адаптацыйны перыяд для бізнесу, тым самым мінімізаваць негатыўны ўплыў на суб'екты гаспадарання», - лічыць Карагін.

Паводле ацэнак бізнес-супольнасці, адзначыў Карагін, рост базавай арэнднай велічыні прывядзе да росту коштаў на прадукцыю і паслугі на 7-12%. «Гэта ударыць па заробках, па развіцці прадпрыемстваў, па канкурэнтаздольнасці нашага бізнесу як на беларускім рынку, так і на рынку Мытнага саюза», - падкрэсліў старшыня прэзідыума РКП.

Паводле яго слоў, у цяперашні час бізнес-саюзы рыхтуюць эканамічнае абгрунтаванне для Мінэканомікі аб неабходнасці перагледзець пастанову ўрада № 172 і знайсці кампраміснае рашэнне па змене базавай арэнднай велічыні.

Карагін не змог назваць аптымальны ў гэтай сітуацыі памер базавай арэнднай велічыні. Разам з тым, ён падкрэсліў, што «не могуць выдаткі на арэнду адразу вырасці на 60%. На 23-25% яшчэ можа быць».

Як паведамлялася раней, Беларуская навукова-прамысловая асацыяцыя (БНПА) ужо накіравала ліст у Міністэрства эканомікі з прапановай устанавіць паніжальны каэфіцыент да новай базавай арэнднай велічыні і змяніць перыяд разліку індэкса спажывецкіх коштаў для яе вылічэння.

«З мэтай нівелявання эфекту перакладання выдаткаў неэфектыўных арэндадаўцаў дзяржаўнай формы ўласнасці на канчатковых спажыўцоў БНПА прапануе Мінэканомікі ўстанавіць паніжальныя каэфіцыенты да базавай арэнднай велічыні. Пры арэндзе аб'ектаў, якія выкарыстоўваюцца пры вытворчасці тавараў, работ, паслуг (за выключэннем фінансавых), прапануецца ўстанавіць каэфіцыент у памеры 0,6 да 31 сакавіка 2014 года і 0,8 на перыяд з 1 красавіка 2014 года па 31 сакавіка 2015 года», - гаворыцца ў лісце БНПА.

Асацыяцыя таксама прапануе ўнесці змены ва ўказ прэзідэнта № 150. У прыватнасці, прапануецца штогод ўстнаўліваць памер базавай арэнднай велічыні «з улікам змянення індэкса спажывецкіх коштаў за перыяд студзень-снежань папярэдняга года і ўжываць з 1 красавіка года, у якім ён устаноўлены».