МУС: На Дзень Волі прыйшло 500 чалавек, нікога не затрымалі
24- 25.03.2013, 11:48
Паводле звестак МУС Беларусі, затрыманняў падчас шэсця і мітынгу 24 сакавіка не зарэгістравана.
«У Менску 24 сакавіка бягучага года адбылася санкцыянаваная Менгарвыканкамам акцыя, прысвечаная гадавіне абвяшчэння Беларускай Народнай Рэспублікі. Мерапрыемства прайшло ў адпаведнасці з зацверджаным фарматам. Колькасць удзельнікаў не перавысіла 500 чалавек», - гаворыцца ў паведамленні МУС.
Між тым, паводле ацэнак арганізатараў, нягледзячы на мароз, адсутнасць шырокай інфармацыйнай кампаніі, прэвентыўныя арышты апазіцыянераў, на акцыю прыйшлі 2 тысячы чалавек.
МУС таксама паведамляе, што затрыманняў падчас акцыі не было.
«Праваахоўнымі органамі забяспечаны належны ўзровень грамадскага парадку, што дазволіла не дапусціць здзяйснення злачынстваў і правапарушэнняў. Затрыманняў падчас шэсця і мітынгу не зарэгістравана», - гаворыцца ў паведамленні.
Нагадаем, пасля акцыі на плошчы Бангалор пачаліся арышты ўдзельнікаў шэсця. Было арыштавана 8 чалавек, у тым ліку тры грамадзяняна Украіны.
Фота: БелаПАН