Грабоўскі стаў зоркай матчу «Таронта» - «Бостан»

Беларускі форвард «Таронта» Міхаіл Грабоўскі закінуў шайбу ў пераможным хатнім паядынку чэмпіянату НХЛ з «Бостанам» і быў прызнаны трэцяй зоркай матчу.

«Таронта» - «Бостан» - 3:2 (1:0, 1:0, 1:2). Шайбы: 1:0 - Кадры (Макартур, Лайлз, 4.58), 2:0 - Грабоўскі (Гамільтан, Фратэн, 22.52), 3:0 - Макларэн (Ор, Маклемент, 41.34), 3:1 - Зайдэнберг (Маршан, 42.30 ), 3:2 - Ферэнс (Крэйчы, Певерлі, 58.44). Кідкі: 13-33 (4-11, 5-9, 4-13). Штраф: 7-9. Брамнікі: Рэймер, 93,9% адбітых кідкоў - Худобін, 72,7% адбітых кідкоў (Раск, 41.34; 100% адбітых кідкоў).

Міхаіл Грабоўскі вызначыўся ў пачатку другога перыяду, калі зрабіў лік 2:0 на карысць сваёй каманды. Пачаўшы рэйд уздоўж правага борта са сваёй паловы пляцоўкі і вышмыгнуўшы па шляху руху ад сілавога прыёму Мілана Лучыча, беларус уварваўся ў чужую зону і рэзка прытармазіў ў правым крузе укідвання, дзе яго сустракалі абаронца Мэт Барткоўскі і форвард Давід Крэйчы. І Крэйчы на імгненне перахапіў шайбу ў Грабоўскага, аднак беларус здолеў выдрапаць яе ў суперніка і кісцевым кідком з-пад суперніка паразіў мэту над правым шчытком расейскага галкіпера «Бостана» Антона Худобіна, паведамляе БелТА.

У пачатку трэцяга перыяду хакеісты «Таронта» павялічылі сваю перавагу да 3:0, аднак госці, якія ў два з паловай разы перасягнулі супернікаў па колькасці кідкоў у створ варот, здолелі адрадзіць інтрыгу, якая пратрымалася да фінальнай сірэны. Тым не менш, «Кляновае лісце» захавала мінімальную перавагу, атрымала важную перамогу і ўмацавала свае пазіцыі ў зоне плэй-оф.

Міхаіл Грабоўскі вызначыўся закінутай шайбай ў другой сустрэчы запар. Беларус выходзіў на лёд у адным звяне з канадцамі Мэтам Фратэнам і нядаўна выкліканым з фарм-клуба Райанам Гамільтанам, які праводзіў усяго 4-ы свой матч у НХЛ. Грабоўскі правёў на пляцоўцы 13 хвілін 56 сек (20 змен), зарабіў 1 (1+0) бамбардзірскі бал, выканаў 1 кідок у створ варот, ужыў 1 сілавы прыём, здзейсніў 1 страту, 1 перахоп, выйграў 6 з 10 укідванняў, завяршыў паядынак з паказчыкам карыснасці «+1» і быў прызнаны трэцяй зоркай матчу. Першая зорка дасталася галкіперу «Таронта» Джэймсу Рэймеру, які адбіў 31 з 33 кідкоў, другую атрымаў сілавы форвард гаспадароў Колтан Ор, які вызначыўся галявым пасам і кулачным боем супраць форварда «Бостана» Шона Торнтана.

З 37 ачкамі пасля 32 матчаў «Таронта» займае 6-е месца ва Усходняй канферэнцыі.

Міхаіл Грабоўскі ў 32 паядынках з пачатку чэмпіянату НХЛ набраў 13 (8 +5) бамбардзірскіх балаў пры 24 хвілінах штрафу і паказчыку карыснасці «-8».

Фота: AFP