Лукашэнка даручыў КДБ заняцца «чысткамі»

Падобна, неўзабаве сярод чыноўнікаў і бізнесменаў пройдуць новыя арышты.

Сёння Лукашэнка запатрабаваў «бескампраміснай барацьбы з карупцыяй». Такую задачу ён паставіў, прызначаючы кіраўнікоў КДБ.

«Мне ўсё часцей і часцей, у тым ліку з Камітэта дзяржбяспекі, прыходзіць інфармацыя аб дзейнасці карупцыйнай накіраванасці асобных кіраўнікоў органаў улады. Лічыце, гэта ваша з пракурорам найважнейшая задача на сучасным этапе. Калі мы яе не вырашым, калі мы не ліквідуем праблемы, звязаныя з карупцыяй у нашай дзяржаве, дні не толькі нас, але і нашай дзяржавы будуць палічаныя», - сказаў дыктатар.

«У нас няма таго матэрыяльнага рэзерву, які маецца ў Расеі, няма той колькасці прыродных рэсурсаў, у нас нават няма таго, што мае Украіна, каб потым пераадолець дзіркі, якія створаць у нашым грамадстве нядбайныя кіраўнікі. Таму мы павінны змагацца за чысціню нашых шэрагаў, і не толькі ў Камітэце дзяржаўнай бяспекі. Ваша задача - чысціць грамадства і верхавіну гэтага грамадства. Усе законы ў вас на руках. Гэта будзе ваша найважнейшая задача», - адзначыў ён.

Па словах дыктатара, яму «ўсё больш і больш дакладваюць аб ненармальнай дзейнасці асобных нашых кіраўнікоў»:

«Рашэнні будуць імгненнымі і адназначнымі. І не будзе таго, што вось гэта простае парушэнне, - ну, папаляваў чалавек, забіў ён ласенка або кабана, давайце яго прабачым. Ну, а вось тут у энергетыцы сотні мільёнаў даляраў страчана з-за несвоечасовасці ўводу энергамагутнасцяў ці ж нерацыянальнага выкарыстання інвестыцыйных сродкаў, вось гэта сапраўды злачынства. Не, у абодвух выпадках - злачынства, і па кожнаму - свой артыкул».

Лукашэнка прывёў канкрэтны прыклад: «Як мне цяпер далажылі праваахоўныя органы, ужо па паляўнічай справе (менавіта так, напэўна, яе назавуць журналісты) ў следчым ізалятары паўдзесятка людзей. Усе з партфелямі кіраўнікоў. Я гэта кажу не таму, што не трэба вам паляваць. Палюйце, але ведайце час, месца, і з кім вы гэта будзеце рабіць».

У адваротным выпадку, лічыць Лукашэнка, «мы страцім краіну»:

«Не будзе па закону, ну што ж, тады вы самі выбралі гэты шлях. Тое ж самае і ў энергетыцы, і ў дрэваапрацоўцы, і гэтак далей. У адваротным выпадку мы страцім краіну. Мы скоцімся да таго ўзроўню, на які скаціліся некаторыя суседнія з намі краіны некалі былога Савецкага Саюза.

Я ўжо нядаўна сказаў і паўтару яшчэ раз публічна: калі толькі мне будзе даложана, што нейкі чыноўнік, не толькі вашага ўзроўню кіраўнік, заблытаўся з камерцыйнай структурай у будаўніцтве не тое лазні, не тое яшчэ нейкага гаспадарчага памяшкання ў сябе, гэта нескладана правяраецца, значыць, камерцыйная структура знішчаецца, а чыноўнік ідзе на нары. Гэта не запалохванне людзей, я проста вас усіх папярэджваю».

Прызначаючы кіруючых супрацоўнікаў Дзяржаўнага памежнага камітэта, Лукашэнка падкрэсліў, што гэтыя кадравыя рашэнні звязаныя ў тым ліку з яго нездаволенасцю працай ДПК. У віну памежнікам відавочна паставілі несанкцыянаваны пралёт на тэрыторыю краіны «шведскага дэсанта»:

«І скажу шчыра, што, калі пасля сённяшніх прызначэнняў у камітэце не адбудзецца істотнай, ашаламляльнай змены становішча ў нясенні паўсядзённай службы і абароны дзяржаўнай мяжы, нашай дзяржавы, там будуць яшчэ вялікія змены. Негатыву на мяжы быць не павінна. Вам дадзеныя велізарныя правы законам і заканадаўчымі актамі, дзяржава вам у рукі ўклала зброю - калі ласка, як мужыкі і афіцэры, абараняйце рубяжы нашай дзяржавы», - сказаў дыктатар.