Распачатая справа за затрымкі з уводам магутнасцяў на Бярозаўскай ГРЭС

Па фактах затрымак з уводам магутнасцяў на Бярозаўскай ГРЭС Следчым камітэтам Беларусі ўзбуджаная крымінальная справа.

Пра гэта 16 красавіка на нарадзе па пытанні функцыянавання і развіцця беларускай энергетыкі з удзелам Лукашэнкі далажыў старшыня Камітэта дзяржаўнай бяспекі Валерый Вакульчык, пішуць «Белорусские новости».

Па словах Вакульчыка, аналагічная сітуацыя назіраецца і пры рэканструкцыі Мазырскай ЦЭЦ, дзе таксама зацягваюць тэрміны ўводу - прыкладна на два гады.

Вакульчык паведаміў, што выяўленыя факты нядобрасумленнага падыходу службовых асоб Міністэрства энергетыкі пры арганізацыі дзяржаўных закупак. Так, выпушчаная выгада пры прастойванні блока Бярозаўскай ГРЭС склала 70 млн. даляраў.

У сваю чаргу старшыня Камітэта дзяржаўнага кантролю Аляксандр Якабсон адной з асноўных прычын высокага сабекошту электраэнергіі назваў зацягванне тэрмінаў мадэрнізацыі генерыруючых магутнасцяў. Паводле яго слоў, нядбайнае стаўленне да распрацоўкі праектнай дакументацыі і абгрунтавання выбару пастаўшчыкоў, непрыняцце мер па ўстанаўленні жорсткага кантролю за выкананнем тэхналогій будаўніцтва і ўмоў паставак абсталявання прывяло да зрыву тэрмінаў рэалізацыі шэрагу інвестыцыйных праектаў і значнага іх падаражэння. Так, неаднаразовы перанос тэрмінаў рэалізацыі праектаў на Бярозаўскай ГРЭС і Гродзенскай ЦЭЦ-2, да цяперашняга часу не ўведзеных у эксплуатацыю, ужо запатрабаваў дадатковых выдаткаў у 120 млрд. рублёў. Пры гэтым, паведаміў Якабсон, толькі на камандзіроўкі спецыялістаў «Брэстэнерга» для забеспячэння паставак абсталявання выдаткавана каля 2 млрд. рублёў. Не выконваюцца і новыя тэрміны пастаўкі абсталявання.

Не дабіўшыся зніжэння затратнасці генерыруючых установак і сеткавай гаспадаркі, міністэрства павялічвае аб'ёмы імпарту больш таннай электраэнергіі (на 38% за 2012 год), заявіў кіраўнік КДК.

Міністр энергетыкі Аляксандр Азярэц у сваім дакладзе прызнаў недахопы з уводам шэрагу генерыруючых магутнасцяў, у прыватнасці на Бярозаўскай ГРЭС, Гродзенскай ЦЭЦ, а таксама выдаткі ў працы блока на Менскай ЦЭЦ-5.

На Бярозаўскую ГРЭС, паводле слоў Азярца, неабходнае абсталяванне будзе пастаўлена ў канцы ліпеня. У першым паўгоддзі 2013 года будзе ўведзены парагазавы блок на Гродзенскай ЦЭЦ-2.

Міністр заявіў, што фізічны знос абсталявання з'яўляецца адной з галоўных праблем галіны. Паводле яго слоў, дзяржпраграмай плануецца да 2016 года забяспечыць увод у эксплуатацыю 2.241 МВт высокаэфектыўных тэхналагічных магутнасцяў і пры гэтым вывесці 1.840 МВт тых магутнасцяў, якія сёння не запатрабаваныя і не могуць быць выкарыстаныя. Гэта, на яго думку, дасць магчымасць забяспечыць зніжэнне адмоў у працы абсталявання, паменшыць удзельны расход паліва і атрымаць значную эканомію фінансавых сродкаў. Азярэц адзначыў, што эфект ад рэалізацыі ўсіх мерапрыемстваў ацэньваецца больш чым у 630 млн. даляраў, што ляжа ў базу зніжэння сабекошту электрычнай і цеплавой энергіі.

Ён таксама паведаміў, што з улікам эканамічнай мэтазгоднасці прадугледжваецца развіццё крыніц на мясцовых відах паліва, у тым ліку пабудова чатырох гідраэлектрастанцый сумарнай электрычнай магутнасцю больш за 100 МВт. Праводзіцца сістэмная работа па скарачэнні выдаткаў у галіне, далажыў міністр энергетыкі.