Ланская павязе на «Еўрабачанне» 500 літраў гарэлкі

Пасля леташняй перамогі шведкі Ларын здзівіць у гэтым годзе Еўропу будзе няпроста.

Алёна Ланская з гэтай нагоды моцна не перажывае і кажа, што гатовая заваяваць распешчанага гледача, піша «Комсомольская правда в Беларуси».

Такога размаху, з якім рыхтуецца Ланская да конкурсу, мабыць, не было з часоў Анжалікі Агурбаш. Песню пісалі ў Бельгіі, запісвалі ў Англіі, кліп здымалі ў Турцыі... У Ланской нават аб'явіўся спонсар з Наваполацку, бізнесмен Мікалай Варабей, які вылучыў на падрыхтоўку спявачкі кругленькую суму. Першы транш, дарэчы, склаў $230 000.

Ужо 4 траўня беларуская дэлегацыя ляціць на конкурс у Мальме.

Чым будзе здзіўляць Ланская?

Песнямі

Акрамя конкурснай песні «Салеа» на трох мовах і трох рэміксаў у Швецыю Ланская павязе і свой дэбютны англамоўны альбом, у які трапілі адразу 17 еўрапейскіх трэкаў.

Афіцыйная прэзентацыя дыска адбудзецца 11 траўня на беларускай вечарыне. Праца над альбомам ішла больш за год у Швецыі, Лондане і Бельгіі. Песні абышліся спявачцы ў некалькі сотняў тысяч еўра.

Вобразам

Над сцэнічным іміджам спявачкі зараз працуюць знакамітыя грэчаскія стылісты, тыя самыя, што ў свой час стваралі вобраз Дзіме Калдуну, Ані Лорак, Алене Папарызу. Менавіта яны прымусілі Ланскую пастрыгчы валасы, якія яна расціла з 14 гадоў, на 20 сантыметраў. Падабралі стылісты і гардэроб: пачынаючы ад туфляў і касцюмаў на кожны дзень, заканчваючы сукенкай на выступ.

Нумарам

На сцэне са спявачкай будуць знаходзіцца тры танцора - адзін з Германіі, другі - з Славеніі, а трэці, афраамерыканец, будзе адразу танчыць і падпяваць Ланской. Будуць яшчэ на сцэне і дзве бэк-вакалісткі з Сербіі. Пастаноўкай нумара займаецца сербская харэограф-пастаноўшчык Зіле-Алекс Райфавіч. Ён, дарэчы, не пачатковец на конкурсе. У 2008 годзе ён ставіў нумар для Македоніі, а яшчэ раней для Сербіі і Балгарыі.

Спецыяльна для нумара Ланской ў Сербіі рыхтуецца дыскабол. Паводле задумы пастаноўшчыка гэта і будзе тая самая планета «Салеа», пра якую спявае Ланская. Планета будзе свяціцца, а ў канцы нумара на ёй з'явіцца карта Еўропы з яркай зоркай. А вось дзе будзе свяціцца гэтая зорка на дыскаболе - у Швецыі ці ў Беларусі - прадзюсары Ланской пакуль не вызначыліся.

Промапрадукцыяй

У прома ў Ланской будуць больш 50-і розных найменняў. Акрамя традыцыйных дыскаў, маек, ручак і значкоў у Мальме на спецыяльнай фуры ўжо праз тыдзень адправяць 1000 пернікаў, столькі ж бутэлек гарэлкі, 400 каробак зефіру, 1000 каробак мармеладу і дражэ, столькі ж шакаладак «Аленка», 400 каробак цукерак, 500 флэшак для кампутара, столькі ж куртак-вятровак. Будзе і спецыяльны кубік-рубік, і крыштальная дэкаратыўная планета, і кубкі, і г.д.

У каманду Ланской увайшлі адразу 25 чалавек: прадзюсары, тэлевізійшчыкі, стылісты, візажысты, рэжысёры-пастаноўшчыкі, журналісты, урач-фаніятар і інш. Праўда, ні спонсар прадзюсарскага цэнтра «Спамаш», пры якім спявае Ланская, бізнесмен Аляксандр Шакуцін, ні нафтавы магнат з Наваполацка Мікалай Варабей у Швецыю не паляцяць.