Жыхары Цнянскай адстаялі спартыўную пляцоўку

Другая спроба СТАА «Тамбаз» пачаць будаўніцтва жылога дома на месцы спартыўнай пляцоўкі па вул. Цнянскай у Менску не ўвянчалася поспехам.

Гэта вынікае з ліста Камітэта архітэктуры і горадабудаўніцтва Менгарвыканкама ад 3 траўня.

«Улічваючы падвядзенне вынікаў правядзення грамадскага абмеркавання, а таксама ў мэтах выканання даручэнняў Савета Міністраў Рэспублікі Беларусь ад 01.04.2013 № 04/650-110, 650-118, 650-119 і ад 04.04.2013 № 04/760-194 аб неабходнасці змены працэдуры прадастаўлення зямельных участкаў забудоўшчыкам, прынятае рашэнне аб немагчымасці будаўніцтва СТАА «Тамбаз» аб'екта «Жылы дом з падземнай аўтастаянкай і аб'ектамі гандлю і абслугоўвання на скрыжаванні вул. Цнянская і зав. Я Коласа», - гаворыцца ў лісце Камітэта архітэктуры і горадабудаўніцтва Менгарвыканкама.

У сакавіку гэтага года праходзіла грамадскае абмеркаванне аб'екта «Жылы дом з падземнай аўтастаянкай і аб'ектамі гандлю і абслугоўвання на скрыжаванні вул. Цнянская і зав. Я Коласа» супраць рэалізацыі якога выступілі больш за 3000 мясцовых жыхароў.

Але адміністрацыя Савецкага раёна г. Менска прыняла рашэнне лічыць будаўніцтва аб'екта мэтазгодным з некаторымі абмежаваннямі: вышыня дома не больш 7-мі паверхаў, пашырэнне вуліц, аднаўленне спартыўнага ядра і г. д.