«Вясна» не падзяляе аптымізму Палецкіса

Сітуацыя з правамі чалавека ў Беларусі стабільна дрэнная з тэндэнцыяй да пагаршэння.

Такім чынам праваабаронца Таццяна Рэвяка пракаментавала сайту charter97.org справаздачу дакладчыка дэлегацыі Еўрапарламента па Беларусі Юстаса Палецкіcа, у якой гаворыцца, што ў Беларусі адбылося прыкметнае паляпшэнне сітуацыі з правамі чалавека.

«Праваабарончы цэнтр «Вясна» не падзяляе аптымізму Палецкіса. Вядома, нам бы таксама хацелася, каб сітуацыя з правамі чалавека паляпшалася. Але мы адштурхваемся ад рэальнасці, у якой мы жывем, якую мы фіксуем. У нас іншыя высновы. Сітуацыя з правамі чалавека - стабільна дрэнная. А за апошнія два месяцы відавочная тэндэнцыя да пагаршэння. Калі яшчэ ў пачатку вясны мы казалі проста пра стабільнасць, можа быць, нават застой, то цяпер мы фіксуем тэндэнцыю да пагаршэння сітуацыі», - лічыць Таццяна Рэвяка.

Праваабаронца спадзяецца, што ЕЗ не адмаўляецца ад умоў, якія вылучаліся перад беларускімі ўладамі для аднаўлення дыялогу.

«Хацелася б, каб Еўразвяз і яго структуры, у тым ліку Еўрапарламент, не забывалі пра тыя ўмовы, якія вылучаліся для аднаўлення дыялогу, і якія ўжо больш за два гады артыкуляваліся беларускаму боку. Перш за ўсё, галоўнай перадумовай для аднаўлення дыялогу з'яўляецца вызваленне палітвязняў. І калі цяпер гэта перадумова здымаецца, значыць ЕЗ павінен пра гэта дакладна сказаць. Калі гэта адбудзецца, будзем ужо зыходзіць з новай рэальнасці. Пакуль гэтага не адбылося, я спадзяюся, што тыя ацэнкі, якія, у тым ліку даюць, беларускія праваабаронцы, усё ж такі будуць пачутыя ў ЕЗ», - склала праваабаронца.

Нагадаем, дакладчык дэлегацыі Еўрапарламента па Беларусі заявіў пра тое, што ў 2012 годзе ў Беларусі адбылося «прыкметнае паляпшэнне сітуацыі з выкананнем правоў чалавека, а «Еўрапейскі дыялог аб мадэрнізацыі» аказаў станоўчы ўплыў на развіццё грамадзянскай супольнасці». Зыходзячы з гэтага, ён прапанаваў пашырыць кантакты з беларускімі чыноўнікамі, падрыхтаваць «дарожную карту» па развіцці дыялогу з афіцыйным Менскам, уключаючы міжпарламенцкія адносіны, выключыць з «чорных спісаў» ключавых чыноўнікаў для наладжвання дыпламатычных каналаў.

Дадзеныя рэкамендацыі змяшчаюцца ў дакладзе, падрыхтаваным Палецкісам і апублікаваным на сайце Еўрапарламента.