Дыктатар прызначыў «крайніх» за правал «мадэрнізацыі»

Лукашэнка заявіў пра асабістую адказнасць віцэ-прэм'ера, чыноўнікаў і кіраўнікоў дзяржпрадпрыемстваў за «мадэрнізацыю» вытворчасці.

«Аляксандр Лукашэнка папярэдзіў намесніка прэм'ер-міністра, чыноўнікаў і кіраўнікоў прадпрыемстваў аб асабістай адказнасці за безумоўнае выкананне праграмы комплекснай «мадэрнізацыі». Вынікі гэтай работы па выніках першага паўгоддзя будуць разгледжаныя на нарадзе ў кіраўніка дзяржавы», - сказана ў паведамленні прэс-службы прэзідэнта пасля дакладу Пятра Пракаповіча.

Паводле яго слоў, «у цяперашні час прыкладна чвэрць прадпрыемстваў яшчэ не пачалі такую працу». «Мы плануем, што на працягу другога квартала гэтую працу пачнуць ўсе прадпрыемствы. Таксама будзе забяспечана выкананне задачы па асваенні ў гэтым годзе інвестыцый у асноўны капітал», - адзначыў віцэ-прэм'ер.

Лукашэнка таксама заявіў пра завышэнне ў шэрагу выпадкаў кошту «мадэрнізацыі». «Праверка абгрунтаванасці разлікаў па мадэрнізацыі, праведзеная Камітэтам дзяржаўнага кантролю, паказала, што дзе-нідзе да гэтых пытанняў падышлі фармальна. Аказваецца, не ўсё чыста і не ўсё прадумана», - сказана ў паведамленні.

Ён нагадаў: «На пасяджэнні Савета міністраў я папракнуў урад у тым, што занадта астранамічныя сумы налічылі на мадэрнізацыю, не ведаю, праўда, па якім крытэры - я проста хацеў некалькі астудзіць запал урада, паказаўшы на тое, што мадэрнізацыя - гэта нятанны працэс, але, тым не менш, ён павінен быць рэальна пралічаным».

Як паведамлялася, у пачатку сакавіка Лукашэнка прызначыў свайго былога памочніка па эканоміцы, экс-кіраўніка Нацбанка краіны, цяперашняга віцэ-прэм'ера Пракаповіча «назіральнікам» ва ўрадзе па пытаннях мадэрнізацыі вытворчасці.