Брэсцкі суд адмовіў незалежнай журналістцы

Фотакарэспандэнт газеты «Брестский курьер» Мілана Харытонава спрабавала дамагчыся перагляду рашэння суда Маскоўскага раёна Брэста.

Адказчыкам па гэтай справе з'яўляецца карэспандэнт выдання «Брестский вестник» Уладзімір Міневіч, які ў мінулым годзе размясціў абразлівыя каментары ў дачыненні да незалежнай фотажурналісткі на адным з інтэрнэт-парталаў. Суд першай інстанцыі адхіліў пазоў Міланы Харытонавай, спаслаўшыся на тое, што адказчык мае канстытуцыйнае права на свабоду слова, паведамляе ПЦ «Вясна».

6 траўня, падчас разгляду касацыйнай скаргі ў абласным судзе, Мілана Харытонава спрабавала даказаць, што нават у лінгвістычнай экспертызе, зробленай па замове суда, было пазначана, што выкарыстаныя Міневічам выказванні могуць абразіць чалавека, зняважыць яго гонар і годнасць. Тым не менш, абласны суд пакінуў без зменаў рашэнне суда Маскоўскага раёна Брэста.

Незалежная журналістка ўпэўненая, што калі б такія выказванні тычыліся кагосьці з чыноўнікаў ці тых самых суддзяў, справа мела б зусім іншы вынік. Мілана Харытонава паведаміла, што мае намер працягваць абскарджваць, на яе погляд, неабгрунтаванае і палітычна матываванае рашэнне.