Таксістаў змушаюць купляць расейскія аўтамабілі

Уводзячы абмежаванні на выкарыстанне таксовак, беларускія ўлады лабіююць расейскі аўтапрам.

Такім чынам намеснік старшыні Беларускага кангрэсу дэмакратычных прафзвязаў Сяргей Антусевіч пракаментаваў сайту charter97.org прапанову Міністэрства транспарту абмежаваць выкарыстанне аўтамабіляў у якасці таксовак васьмю гадамі.

«Дзяржава можа ўводзіць абмежаванні і прыкрываць іх бяспекай, правамі спажыўцоў і гэтак далей. Відавочна, што чым старэйшы аўтамабіль, тым больш небяспечны як з пункту гледжання бяспекі, так і шкодных выкідаў. Але пасля ўступлення Беларусі ў адзіную мытную прастору, у нас не стала больш новых аўтамабіляў. Натуральна тыя, што ўжо маюцца, з кожным годам будуць старэць. Мы ўсе выдатна разумеем, што таксоўка - гэта самаход, які працуе кожны дзень, і пасля такой працы ад яго застаецца мала «жывога». І таксісты, якія будуць не ў стане замяніць аўто, страцяць магчымасць працаваць», - мяркуе прафзвязны лідар.

Ён падкрэсліў, што беларускім уладам выгадна ўводзіць такія абмежаванні.

«Грамада таксістаў будзе вымушаная купіць новыя аўтамабілі тыпу «Лада Каліна», гэта значыць больш танныя, чым якасныя японскія, нямецкія і амерыканскія аўто такога ж класу. Такім чынам, падвышаецца аб'ём продажаў самаходаў ніжэйшай якасці. Наўрад ці людзі хочуць перасаджвацца на расейскія аўтамабілі, прызвычаіўшыся да якасных самаходаў. У гэтым сэнсе Беларусь бароніць інтарэсы Расеі», - упэўнены Сяргей Антусевіч.

Ён таксама адзначыў, пакуль людзі раз'яднаныя, яны не здольныя абараніць свае інтарэсы.

«Гэта відавочна, і пра гэта сведчаць шмат якія прыклады. Узяць хаця б «Граніт», дзе людзі паспрабавалі аб'яднацца. І хоць нам не ўдалося легалізаваць незалежны прафзвяз, але заробкі ў работнікаў прадпрыемства сталі значна вышэйшымі. Гэта з'яўляецца прыкладам таго, што самаарганізацыя людзей прымушае чыноўнікаў развязваць праблемы. Калі будзе створана арганізацыя таксістаў, то яны будуць уяўляць сабой сілу, і ўлады будуць вымушаныя з гэтым лічыцца і ўступаць у перамовы», - заявіў намеснік старшыні БКДП.

Нагадаем, Мінтранс Беларусі прапануе абмежаваць выкарыстанне аўтамабіляў у якасці таксовак васьмю гадамі.

Больш за палову таксістаў могуць застацца без працы.

Цяпер у Беларусі на рынку перавозак пасажыраў таксоўкамі выкарыстоўваецца пад 16 тысяч легкавікоў. Паводле ацэнкавых звестак, больш за 60% таксовак маюць тэрміны эксплуатацыі больш за 8 гадоў. Выкарыстанне транспарту з доўгім тэрмінам эксплуатацыі патэнцыйна зніжае бяспеку перавозак пасажыраў.