Дэвід Кэмеран: Рэжым Башара Асада ўжываў і ўжывае хімічную зброю
8- 9.05.2013, 10:38
Урад Велікабрытаніі валодае пераканаўчымі звесткамі аб прымяненні хімічнай зброі сіламі Башара Асада.
Пра гэта заявіў прэм'ер-міністр Злучанага каралеўства Дэвід Кэмеран, які 10 траўня збіраецца ў Сочы абмеркаваць сітуацыю ў Сірыі з Уладзімірам Пуціным.
«Да нас працягваюць паступаць абмежаваныя, але пераканаўчыя звесткі адносна таго, што вядомы сваёй жорсткасцю рэжым Башара Асада ўжываў і ўжывае хімічную зброю, уключаючы зарын, - цытуе заяву брытанскага палітыка ІТАР-ТАСС. - Прастора для сумненняў па гэтым пытанні працягвае скарачацца».
Брытанія настроена самым рашучым чынам у сувязі з выяўленымі фактамі, адзначыў Кэмеран: «Мы працягнем дзейнічаць па ўсіх франтах: будзем працаваць з нашымі саюзнікамі, падтрымліваць сірыйскую апазіцыю і дамагацца выпрацоўкі палітычнага варыянту ўрэгулявання канфлікту».
Раней ён тлумачыў, што неабходнасць правядзення перамоваў па сітуацыі ў Сірыі дыктуецца нарастальным узроўнем жорсткасці.
Адзначым, што брытанская прэса ўжо публікавала відэасведчанні таго, што ў сірыйскім канфлікце ўжываецца хімічная зброя.