Жыхарам Тыбету дазволілі выкарыстоўваць фота Далай-ламы
8- 28.06.2013, 11:00
- 7,830
Кітайскія ўлады пасля 17-гадовай забароны дазволілі паказваць выявы духоўнага лідара Тыбета Далай-ламы на тэрыторыі шэрагу манастыроў.
У прыватнасці праваабарончая арганізацыя «Свабодны Тыбет» паведамляе пра тое, што забарона адмененая на тэрыторыі рэлігійнага цэнтра Гандзі ў сталіцы правінцыі - горадзе Лхаса, перадае BBC.
Гэта рашэнне адмяняе забарону на дэманстрацыю фотаздымкаў Далай-ламы, уведзенае ў 1996 годзе.
Радыёстанцыя «Свабодная Азія» паведаміла, што ўлады ў правінцыях Цынхай і Сычуань таксама дазволілі манахам адкрыта шанаваць Далай-ламу і паказваць яго выявы.
Брытанская газета Independent піша, што такое рашэнне можа стаць знакам новай рэлігійнай палітыкі цяперашняга лідара Кітая Сі Цзіньпіна і дапаможа знізіць узровень напружання паміж тыбетцамі і кітайскім урадам.
Тыбет акупаваны Кітаем у 1950 годзе. Яго ўключэнне ў склад КНР у выніку ваеннага ўварвання застаецца складаным і супярэчлівым пытаннем аж да цяперашняга часу. У Дхарамсале (Індыя) знаходзіцца ўрад Тыбета ў выгнанні, кіраўніком якога да 2002 з'яўляўся Далай-лама XIV - адзін з самых вядомых і паважаных людзей у свеце.
Акцыі ў падтрымку барацьбы тыбетцаў за свае нацыянальныя і рэлігійныя правы рэгулярна праходзяць па ўсім свеце. У Менску іх праводзілі актывісты руху «Зубр» у 2001 годзе і грамадзянскай кампаніі «Еўрапейская Беларусь» у 2008 годзе.