Андрэя Гайдукова асудзілі на 1,5 года калоніі

Актывіста апазіцыі прызналі вінаватым у спробе ўстанаўлення кантактаў з замежнай выведкай.

Прысуд Андрэю Гайдукову сёння вынес Віцебскі абласны суд, перадае «Радыё Свабода».

Разгляд справы актывіста з Наваполацка праходзіў у закрытым рэжыме. 23-гадовага рабочага завода «Нафтан» першапачаткова абвінавачвалі па двух артыкулах: частцы 1 артыкула 14 - «Замах на злачынства» і частцы 1 артыкула 356 - «Здрада дзяржаве».

19 чэрвеня старшыня Камітэта дзяржаўнай бяспекі Валерый Вакульчык заявіў пра тое, што актывіста апазіцыі могуць асудзіць па іншым артыкуле.

20 чэрвеня суд дапытаў у якасці сведкі маці Андрэя Гайдукова. Жанчына ўбачыла сына ўпершыню за 8 месяцаў, якія той правёў пад вартай пасля затрымання 8 лістапада 2012 года.

На судовым пасяджэнні па справе Андрэя Гайдукова, якое праходзіла 27 чэрвеня, дзяржабвінаваўца запрасіў для яго 2 гады зняволення.

Пра гэта паведаміў журналістам генеральны пракурор Аляксандр Канюк. На які артыкул перакваліфікаванае абвінавачванне, ён тады не ўдакладніў.

Паводле афіцыйнага паведамлення прэс-службы КДБ, Андрэя Гайдукова затрымалі ў Віцебску «падчас закладкі схованкі са звесткамі, якія могуць цікавіць замежныя спецслужбы».

Родныя і сябры не вераць у тое, што Гайдукоў мог займацца шпіянажам, яны тлумачаць ціск з боку КДБ апазіцыйнымі поглядамі хлопца і яго імкненнем стварыць у Наваполацку міжнароднае грамадскае аб'яднанне «Саюз маладых інтэлектуалаў.