Транспартнікі вырашылі пакінуць Менск без трамваяў?
38- 15.07.2013, 16:07
- 26,705
Трамваяў на вуліцах Менска стане зусім мала: у ліпені плануецца закрыць трамвайны рух па праспекце Машэрава і Старавіленскім тракце.
Як паведамілі аглядальніку партала www.interfax.by у ГП «Менсктранс», у сувязі з пачаткам чарговага этапу па рэканструкцыі трамвайнага шляху з 20 ліпеня пасажыраў будзе абслугоўваць часовы аўтобусны маршрут № 903 «ДС «Возера» - Змітрака Бядулі». Пры паездках у ім да канца месяца сапраўдныя ліпеньскія шматразовыя праязныя дакументы на трамвай.
Да закрыцця трамвайнага руху ў бок ДС «Возера» дадзены напрамак абслугоўваюць маршруты рэйкавага транспарту №№ 3 і 4. Пасля пачатку рамонтных работ у Менску застанецца ўсяго тры пастаянных трамвайных маршруты: № 2 «ДС «Мяснікова» - Кастрычніцкая», № 7 «ДС «Серабранка» - ДС «Мяснікова» і № 9 «ДС «Серабранка» - Трактарны завод». Хутчэй за ўсё, у якасці кампенсацыі знятага руху будзе задзейнічаны які-небудзь часовы маршрут, але агульнай гнятлівай карціны гэта не мяняе.
З 15 красавіка ў Менску ўжо закрыты трамвайны рух на ўчастку ад вуліцы Чырвонай да мікрараёна Зялёны Луг. У сувязі з гэтым пасажыры адчуваюць нязручнасці з-за таго, што на перапоўненай транспартам вуліцы Якуба Коласа, дзе вядуцца работы, аўтобусы часовага маршруту № 906 нярэдка курсіруюць з парушэннем графіка.
На які тэрмін закрываецца трамвайны рух у бок ДС «Возера», транспартнікі пакуль не паведамляюць.