Імпарт адпраўляе беларускія тавары на склад

Беларусы купляюць усё больш імпартных тавараў, у той час як айчынныя вытворцы працягваюць запаўняць склады.

Пра тое, як паспяхова айчынныя маркетолагі працуюць над разгрузкай складоў, сведчыць дынаміка іх долі ў продажах у параўнанні з замежнымі аналагамі. Тыя групы тавараў, па якіх назіраецца найбольшы паказчык затаваранасці складоў, усё больш прайграюць у канкурэнтнай барацьбе імпарту, піша «Ежедневник».

Сярод спажывецкіх тавараў склады больш усяго запоўніў айчынны абутак. На 1 чэрвеня яго складскія запасы склалі 293% да месячнай вытворчасці. Пры гэтым вытворцы і не думаюць скарачаць аб'ёмы выпуску - у першым паўгоддзі гэтага года абутку было выраблена на 2,3% больш, чым за той жа перыяд 2012-га. Прадаваць жа выраблены велізарнымі аб'ёмамі тавар атрымліваецца ўсё горш. Беларусы, павялічыўшы свае даходы, здрадліва накіраваліся да імпартных туфлікаў: калі ў мінулым годзе на замежныя тавары прыпадала 36% продажаў, то цяпер доля імпарту ўзрасла да 41%.

Не хочуць беларусы купляць і старую айчынную вопратку, якая заляжалася на складах. Па трыкатажных вырабах доля імпарту ў продажах вырасла з 21 да 29%. Верхняе адзенне заморскіх вытворцаў зараз займае 40% прададзенага аб'ёму, леташні паказчык быў на ўзроўні 36%. Так як прадукцыю са складоў «збагрыць» няма каму, запасы ўжо дасягнулі 189% да сярэднямесячнай вытворчасці. Гэтая сітуацыя прымусіла беларускіх швейнікаў зменшыць тэмпы вытворчасці ўсяго толькі на 1,7%.

Яшчэ больш непрыгожая сітуацыя з бытавой тэхнікай. Напрыклад, сярод прададзеных пральных машын доля айчынных скарацілася з 66% да 47%. Нежаданне суайчыннікаў купляць мясцовую тэхніку не перашкодзіла вытворцу ў гэтым годзе выпусціць прадукцыі на 20% больш, чым у леташні перыяд. У выніку складскія запасы «пралак» з пачатку года падвоіліся і цяпер складаюць 255%.

Трошкі зменшыць абароты пры выпуску непатрэбнай прадукцыі айчынных вытворцаў прымусіў абвал на рынку тэлевізараў. Можна канстатаваць, што за першае паўгоддзе «Гарызонт» і «Віцязь» страцілі беларускі рынак: у мінулым годзе іх доля складала 44%. Цяпер жа 80% продажаў прыпадае на замежных канкурэнтаў.

Беларускія халадзільнікі на гэтым фоне нядрэнна трымаюць сваю перавагу. Іх доля ў продажах хоць і скарацілася, але нязначна - на 4% да 72% у прададзеным аб'ёме. Вытворчасць, праўда, таксама павялічылася на 4,3% пры скарачэнні экспарту на 10%. Пра складскія запасы статыстыка чамусьці змоўчала.

Беларускі ўрад ужо спрабаваў змагацца з імпартам забароннымі мерамі. Як памятаем, павелічэнне пошлін на ўвоз замежных тэлевізараў нічым не дапамагло. Тым больш што ў сітуацыі ўдзелу ў Мытным саюзе і вымушанай гульні па правілах СГА паказваць чырвонае святло імпарту будзе ўсё больш складана. Магчыма, калі ў даляравым эквіваленце даходы беларусаў зноў скароцяцца, яны зноў пачнуць «купляць беларускае». Варыянт, што айчынныя вытворцы пачнуць выпускаць больш канкурэнтаздольную прадукцыю і прыцягнуць спажыўца якасцю, пакуль выглядае малаверагодным.