Рабочаму адпомсцілі за скандальны «серыял» пра МАЗ

Звольнены рабочы, які зняў «жасцянку» пра будні Менскага аўтазавода.

Пра гэта Руслан Мірзоеў паведаміў у інтэрв'ю сайту charter97.org.

«Мяне звольнілі. З першага жніўня я ўжо не буду працаваць на МАЗе. Начальнік мне прапанаваў зрабіць гэта па ўласным жаданні. У адваротным выпадку да мяне б ужылі жорсткія меры, якія вымусілі б мяне зрабіць гэта. Але я нават рады», - адзначыў рабочы.

Ён паведаміў, што ўжо мае планы на будучыню.

«Мяне запрасілі ў ролі вядучага шоў па баях без правілаў у Маскве. Я паеду на выходных на пробы. Калі ўсё будзе ўдала, то, магчыма, забяспечу сабе нейкую будучыню ў свеце шоў-бізнесу. Калі не атрымаецца, то ёсць варыянт у прыватнай фірме па вытворчасці пластыкавых вокнаў», - кажа Руслан.

Ён дадаў, што займаецца музыкай, але даходу яна асабліва не прыносіць.

«Як наогул у Беларусі можна «выехаць» на музыцы? Гэта магчыма, але трэба прыкласці гіганцкія намаганні, «засвяціцца» за мяжой, каб гэта дало нейкія матэрыяльныя дывідэнды. Можна «засвяціцца» на «Славянскім базары», але ў мяне рэпертуар не той», - іранізуе аўтар скандальнага відэа.

Хлопец пацвердзіў, што з'яўляецца майстрам спорту па боксе.

«Зарабляць на жыццё спортам можна, але гэта каласальная праца. Трэба кінуць усё, паставіць на карту выключна спорт, і тое не факт, што ён стрэліць. У мяне раней было дзікае імкненне, дамагчыся высокіх вынікаў у спорце, але зараз няма таго запала. Калі б ён быў, я б, вядома, рызыкнуў - закінуў бы ўсё і пайшоў бы трэніравацца па тры разы на дзень, каб чагосьці дасягнуць. А проста хаджэнне раз у дзень на трэніроўку асаблівага плёну не дасць. Трэба, каб агеньчык з'явіўся ў сэрцы, тады нешта атрымаецца», - падкрэсліў рабочы.

Ён таксама не выключае сябе ў ролі журналіста.

«Я б мог заняцца журналістыкай, але гэта такая сфера, дзе вельмі шмат хлусні і паклёпу, хоць, у прынцыпе, з якога боку паглядзець. Таму калі будуць нейкія цікавыя прапановы, то я, натуральна, рады пайсці на кантакт і падумаць, але каб гэта не моцна тычылася палітыкі. Калі зрабіць нешта смешнае і гумарное, то тады так», - падсумаваў Руслан Мірзоеў.

Нагадаем, супрацоўнік Менскага аўтазавода Руслан Мірзоеў зняў і выклаў у Інтэрнэт серыю скандальных відэаролікаў пра будні завадчанаў. Рабочаму пагражалі ўзбуджэннем крымінальнай справы і патрабавалі выдаліць відэа.