Лета вярнулася ў Беларусь

Надвор'е ў Беларусі значна палепшыцца ў выходныя.

Сёння ўмовы надвор'я на тэрыторыі краіны будзе вызначаць вобласць паніжанага атмасфернага ціску. Месцамі ў рэспубліцы чакаюцца кароткачасовыя дажджы, магчымыя навальніцы. У начныя і ранішнія гадзіны ў асобных раёнах будзе слабы туман. Вецер паўночна-заходні ўмераны. Тэмпература паветра: мінімальная ноччу 11..17 ° С, максімальная днём ад 21° С па паўночным усходзе да 28° С па паўднёвым захадзе краіны, паведамляе Гідраметцэнтр Беларусі.

У нядзелю, 28 ліпеня, пад уплывам малаактыўнага атмасфернага фронту ў асобных раёнах рэспублікі яшчэ пройдуць невялікія кароткачасовыя дажджы, не выключаныя навальніцы. Вецер няўстойлівы слабы. У дзённыя гадзіны на крайнія паўднёва-заходнія раёны Беларусі пачнуць паступаць больш цёплыя паветраныя масы з поўдня Еўропы. Тэмпература паветра: мінімальная ноччу 10..17° С, максімальная днём 23..28° С, па паўднёвым захадзе Берасцейскай і Гарадзенскай абласцей 29..31° С.

У панядзелак, 29 ліпеня, Беларусь у асноўным будзе знаходзіцца ў полі павышанага атмасфернага ціску. Паўднёвы захад нашай краіны апынецца пад уплывам вельмі цёплых паветраных мас трапічнага паходжання. Абыдзецца пераважна без ападкаў. Вецер ноччу няўстойлівы слабы, днём паўднёва-ўсходні ўмераны, па захадзе рэспублікі - парывісты. Тэмпература паветра: мінімальная ноччу 10..16° С, максімальная днём 23..29° С; па паўднёвым захадзе ноччу 17..19° С, днём 30..33° С.