815 кіламетраў дарог сталі платнымі

Электронная сістэма платных дарог пачынае працаваць у Беларусі.

Інвестарам па стварэнні ў Беларусі нацыянальнай сістэмы збірання платы за праезд па аўтадарогах рэспублікі (BelToll) выступіла аўстрыйская кампанія Kapsch TrafficCom AG. Агульны кошт праекта склаў 267 мільёнаў еўра.

Асноўная перавага электроннай сістэмы будзе заключацца ў тым, што кіроўцу не трэба спыняцца, каб зрабіць аплату. Новыя тэхналогіі дазволяць рухацца з максімальна дазволенай хуткасцю, не змяняючы паласу руху: аплата будзе спаганяцца аўтаматычна, для чаго дарогу абсталявалі адмысловымі парталамі, абсталяванымі лазернымі датчыкамі, відэа-і фотакамерамі, якія зафіксуюць праезд аўтамабіляў. На транспартных сродках (як правіла, на лабавым шкле) павінны быць устаноўленыя бартавыя прылады электроннай аплаты, якія кіроўцы будуць атрымліваць пад грашовы заклад у 50 еўра, паведамляе РІА Новости.

Кошт праезду аднаго кіламетра дарогі будзе складаць ад 0,04 еўра для легкавых аўтамабіляў да 0,12 еўра для грузавікоў з чатырма і больш восямі. Санкцыі для парушальнікаў рэжыму аплаты складуць да 100 еўра для легкавых аўтамабіляў і да 250 еўра для грузавікоў.

Платнымі стануць у агульнай колькасці 815 кіламетраў дарог краіны. Гэта на першым этапе датычыцца ўсяго працягу аўтамагістралі М-1/Е30 Брэст (Казловічы) - Менск - мяжа Расеі (Рэдзькі), а таксама асобных участкаў аўтамабільных трас M-2 Менск - Нацыянальны аэрапорт «Менск», M-3 Менск - Віцебск, M-4 Менск - Магілёў, M-5/Е 271 Менск - Гомель і M-6/Е 28 Менск - Гродна - мяжа Польшчы (Брузгі). Да 1 студзеня 2014 года мяркуецца пашырэнне сістэмы за кошт будаўніцтва прыдарожнай інфраструктуры на іншых участках аўтадарог, якія з часам будуць станавіцца платнымі. Гэта датычыцца магістралі М-4 Менск-Магілёў і рэканструяваных участкаў М-5 Менск-Гомель.