Украіна просіць Расею часова дазволіць увоз цукерак Roshen

Украінскія ўлады настойваюць на часовай адмене забароны на ўвоз у Расею прадукцыі кампаніі Roshen.

Украінскі бок збірае доказы, каб пераканаць Расею вярнуць на рынак прадукцыю Roshen. Міністр аграрнай палітыкі і харчавання Украіны Мікалай Прысяжнюк запросіць расейскіх экспертаў для праверкі прадукцыі кампаніі і папросіць паралельна дазволіць пастаўкі гэтай прадукцыі ў РФ. Пра гэта міністр заявіў у ходзе брыфінгу пасля пасяджэння ўрада, паведамляе сайт ZN.UA.

Ён таксама адзначыў, што пазіцыя Украіны, датычна гэтай сітуацыі прынцыповая.

«У нас ёсць усе факты і ўсе пацверджанні таго, што наша прадукцыя адказвае стандартам як нашым нацыянальным, так і еўрапейскім, і я ўпэўнены, яна адказвае стандартам Расейскай Федэрацыі. Гэта значыць, калі на сённяшні дзень адбудзецца візіт, у складзе рабочай групы будуць спецыялісты ўсіх напрамкаў. Мы гатовыя весці канструктыўную размову», - заявіў Мікалай Прысяжнюк.

Каля 60% усёй прадукцыі Roshen, што вырабляецца ва Украіне, экспартуецца за мяжу, пры гэтым толькі ў Расею - 40% паставак. І ў выпадку страты расейскага рынку кампанія можа звольніць 8 з 21 тыс. работнікаў.

Нагадаем, у канцы ліпеня Расспажыўнагляд забараніў увоз у Расею кандытарскіх вырабаў, пасля таго як у гэтай прадукцыі былі выяўленыя парушэнні па норме ўтрымання тлушчаў і арганалептыцы, а ў некаторых вырабах было выяўленае рэчыва першага класа небяспекі - бензапірэн. Кіраўнік Расспажыўнагляду Генадзь Анішчанка таксама папярэдзіў партнёраў Расеі па Мытным саюзе пра недапушчальнасць рээкспарту ў Расею прадукцыі Roshen.

Праверку прадукцыі ўкраінскай карпарацыі правялі Казахстан, Беларусь, Малдова і Таджыкістан. Яны заявілі, што прадукцыя адпавядае ўсім неабходным стандартам якасці.