Ладуцька даручыў выгнаць усіх менчукоў на ўборку двароў

Старшыня Менгарвыканкама заявіў, што менчукоў трэба больш актыўна прыцягваць да добраўпарадкавання дваровых тэрыторый.

Пра гэта гаворыцца ўжо трэці год. Тым не менш кіраўніцтва адміністрацыі Ленінскага раёна, сістэмы жыллёва-камунальнай гаспадаркі, на яго думку, недапрацоўваюць у гэтым кірунку, перадае «Менск-навіны».

Мікалай Ладуцька выказаў такое меркаванне на выязным пасяджэнні гарадскога выканаўчага камітэта, дзе давалася ацэнка рабоце кіруючых кадраў адміністрацыі Ленінскага раёна па выніках сацыяльна-эканамічнага развіцця ў першым паўгоддзі 2013 года.

Як адзначыў Ладуцька, супрацоўнікі адміністрацыі, адказныя за ідэалагічную работу з насельніцтвам, дырэктары ЖЭС, старшыні таварыстваў уласнікаў цалкам здольныя пераканаць жыхароў навесці парадак у сваіх дварах. І пажадана пры гэтым звяртаць увагу на знешні выгляд дома, захаванне чысціні ў пад'ездах.

- Трэба прывесці ў парадак кожны двор, кожны пад'езд, кожную ўваходную групу, - сказаў старшыня Менгарвыканкама.