Беларус узначаліў расейскую ваенную паліцыю

Начальнікам галоўнага ўпраўлення ваеннай паліцыі Расеі стаў ураджэнец Беларусі Ігар Сідаркевіч.

Рашэнне пра гэта прыняў Уладзімір Пуцін, паведамляе прэс-служба Мінабароны суседняй краіны.

«Указам прэзідэнта Расейскай Федэрацыі ад 25 ліпеня 2013 года начальнікам Галоўнага ўпраўлення ваеннай паліцыі Міністэрства абароны прызначаны палкоўнік Сідаркевіч Ігар Міхайлавіч» гаворыцца ў паведамленні.

Ён нарадзіўся ў Беларусі, вучыўся ў Ваенным інстытуце фізічнай культуры, у Паўночна-Заходняй акадэміі дзяржаўнай службы і ў Акадэміі Федэральнай службы бяспекі. У ФСБ Ігар Сідаркевіч служыў з 2001 па 2013 гады.

Ваенная паліцыя Расеі пакуль яшчэ не дзейнічае. Закон, які рэгулюе дзейнасць новага ведамства, знаходзіцца на разглядзе Дзярждумы, а на сайце Мінабароны размешчаная аб'ява аб наборы кантрактнікаў у гэта падраздзяленне.

Фота: ria.ru