Відэаролік гродзенца стаў «выбарам рэдакцыі» Vimeo

Ролік працягласцю крыху больш за 6 хвілін уяўляе сабой нарэзку з 99 фільмаў розных жанраў.

З іх пералікам можна азнаёміцца на сайце праекта. У асноўным гэта фантастыка, фэнтэзі і баевікі. Журналісты звязаліся з аўтарам роліка і папрасілі яго трохі распавесці аб сваім відэа. Аказалася, што праца над ролікам пачалася яшчэ ў 2010 годзе, аднак яе прыйшлося адкласці на некаторы час, піша onliner.by.

- Падвярнулася праца над трэйлерамі да расейскіх фільмаў, і я адклаў працу над сваім ролікам, але працягваў глядзець новыя трэйлеры з фільмамі для збору матэрыялу. Увесну 2013 года ў праекце адных толькі трэйлераў было гадзін на 20 і больш, і я вырашыў, што трэба завяршыць пачатае. Спатрэбілася каля 2-3 месяцаў на мантаж, першапачаткова хацеў зрабіць яго разы ў 2 карацей, але багацце прыгожых шотаў і любімыя трэкі прымусілі падоўжыць да 6 хвілін. Я таксама паспрабаваў дадаць сэнс і сувязь паміж кадрамі, - распавёў ён.

- Не хацелася кінуць працу над ролікам?

- Не, ну хіба што з-за пастаянных памылак у софце. Многія пытаюцца: навошта і для каго я гэта зрабіў? Усё проста - мне падабаецца гэта рабіць, і я атрымліваю ад гэтага задавальненне, праца для душы, а не для кліента. Я ведаў, што падобных нарэзак ужо вельмі шмат, але я паставіў сабе мэту яшчэ ў 2010 годзе і выканаў яе.

Нагадаем, раней у гэтым годзе ў раздзеле «Выбар рэдакцыі» апынуўся ролік менчука, зарэгістраванага на Vimeo пад псеўданімам Airwil.