Чатырохгадовага хлопчыка пераабралі мэрам горада ў ЗША

Невялікі амерыканскі гарадок Дорсет у другі раз абраў сваім мэрам дашкольніка.

Чатырохгадовы Бобі Тафтс (на фота) быў абраны кіраўніком населенага пункта ў штаце Мінесота падчас гарадскога фестывалю 4 жніўня, піша Lenta.ru.

Галасаванне ў Дорсеце, які фармальна не мае адміністрацыі, праходзіла ў крамах мястэчка: у гандлёвых кропках былі расстаўленыя урны і ўсе жадаючыя маглі апусціць у іх лісткі з напісанымі на іх імёнамі сваіх любімых кандыдатаў. Галасаваць можна было неабмежаваную колькасць разоў. Пры гэтым выбаршчыкі пры галасаванні павінны былі ахвяраваць адзін даляр на арганізацыю фестывалю.

Калі прыйшоў час падводзіць вынікі галасавання, Бобі Тафтс звярнуўся да насельніцтва і папрасіў аднаго мужчыну з натоўпу дапамагчы яму. Мужчына павінен быў выцягнуць лісток з імем новага мэра з капелюша, куды склалі ўсе «бюлетэні». Выбаршчык з завязанымі вачыма дастаў імя Бобі. Яго папрасілі дастаць яшчэ адзін лісток, і ён зноў выцягнуў паперку з імем Бобі.

Як заявіла мама зноў абранага мэра, і сам хлопчык, і яна былі шакаваныя вынікам. Годам раней мэр быў абраны такім жа спосабам.

У асноўным мэр Тафтс займаецца на сваёй пасадзе дабрачыннасцю. Ён удзельнічае ў разнастайных мерапрыемствах, накіраваных на збор грошай для горада і яго жыхароў, якія маюць патрэбу. У вольны час мэр гуляе і ходзіць на рыбалку. У хуткім часе ён пачне рыхтавацца да школы. У кастрычніку Бобі споўніцца пяць гадоў.