Віцебскія даішнікі прызналі віну ў ДТЗ (Відэа)

Інспектары ДАІ, якія няўдала праскочылі на чырвонае святло і ўчынілі ДТЗ у Віцебску, узялі віну на сябе.

На днях з'явілася інфармацыя аб здарэнні на скрыжаванні Маскоўскага праспекта і вул. Церашковай у Віцебску. Машына ДАІ Opel Vectra на хуткасці перасякала скрыжаванне, у той час як па перпендыкулярнай дарозе ехала Skoda Octavia. У выніку аўтамабілі сутыкнуліся. Як распавяла ўдзельніца гэтай аварыі Ганна, карыстальнік форуму onliner.by anny8855, сёння, праз тры дні пасля ДТЗ, у ДАІ прайшла размова, у выніку якой віну ў аварыі інспектары ўзялі на сябе.

«У мінулую суботу мы праязджалі па тым скрыжавання вуліц каля 18:00, - распавяла Ганна. - У Skoda ехалі: я на пасажырскім сядзенні, муж за рулём і двое нашых дзяцей, аднаму год, другому пяць гадоў. Мы праязджалі на зялёны сігнал, калі на скрыжаванні з'явілася машына ДАІ. Убачылі мы яе толькі за імгненне да ўдару. У той момант нам было гэта ўсё роўна, аднак пасля даведаліся: інспектары ехалі з уключанымі пробліскавымі маячкамі, але без гукавой сігналізацыі. Нам пашанцавала, што Opel так хутка праляцеў. Секундай больш - і адбыўся б бакавы ўдар, усё было б нашмат больш сумна. А так «пацярпела» толькі «жалеза». Дзеці адразу сталі плакаць. Супрацоўнікі Дзяржаўтаінспекцыі павялі сябе нармальна: адразу падышлі, прапанавалі падвезці на машыне калег, куды неабходна. Толькі сказалі, маўляў, вы проста нас не заўважылі».

«Дзяцей я адразу ж адвезла сваёй маці, а пасля вярнулася на месца здарэння, - апісала развіццё падзей жыхарка Віцебска. - Да таго моманту аўтамабілі ўжо адцягнулі да краю праезнай часткі. Прыехала начальства Дзяржаўтаінспекцыі. Мы неяк разгубіліся, у тым ліку з-за мітусні з дзецьмі, не сталі шукаць відавочцаў, пытацца ў іх тэлефон. На самой справе, не ведаю, чым бы скончылася сітуацыя, калі б таксіст не змясціў запіс моманту сутыкнення ў сетцы. Супраць відэа не паспрачаешся. Самі сур'ёзна задумаліся над купляй рэгістратара».

Сёння ж у Дзяржаўтаінспекцыі разбіралі абставіны аварыі. «ДАІ прызнала сябе цалкам вінаватай у ДТЗ: ехалі без гукавога сігналу, - удакладніла Ганна. - Сказалі: «Вінаватыя будуць пакараныя». Нам далі тэлефон ацэншчыкаў. Skoda застрахаваная па «аўтаграмадзянцы». Пашкоджаная ўся пярэдняя частка: два крылы, фары, капот і бампер. Цяпер чакаем ацэнкі».