«Беллегпрам» аб неліквідзе: Мы з гэтага не робім трагедыю

Канцэрн «Беллегпрам» падзяліўся планамі ў барацьбе са складскімі запасамі гатовай прадукцыі.

Пра гэта на прэс-канферэнцыі 6 жніўня паведаміў першы намеснік старшыні канцэрна Сяргей Місурагін, піша БелаПАН.

З ягоных слоў, паводле вынікаў паўгоддзя складскія запасы склалі крыху больш за 2 трлн рублёў, або 226% да сярэднямесячнага аб'ёму вытворчасці.

«Калі аналізаваць апошнія пяць гадоў работы галіны, то да 1 ліпеня дасягаецца пік паводле запасаў гатовай прадукцыі. Потым са жніўня даволі актыўна пачынаецца зніжэнне складскіх запасаў. Гэта звязанае з падрыхтоўкай дзяцей да школы, вяртаннем з адпачынкаў, пачаткам пакупак да асенне-зімовага сезона», - растлумачыў Місурагін.

З ягоных слоў, у гэтым годзе канцэрн «сутыкнуўся з шэрагам пытанняў у рэалізацыі складскіх запасаў. Разам з тым ён растлумачыў, што да 10% запасаў - прадукцыя, якая не знайшла свайго пакупніка ў сезон, астатняя доля - напрацоўка наступнага сезоннага асартыменту.

«Ёсць у нас прадпрыемствы са звышнарматыўнымі запасамі. Тая ж «Элема», дзе дастаткова прыстойныя запасы. Але ўся гэтая прадукцыя знаходзіцца не толькі на складах, але і ў тых жа фірмовых крамах, якія трапляюць пад улік. Мы з гэтага не робім трагедыю, прадпрыемства ўстойлівае фінансава і да сезону - восені-зімы - яны рэалізуюць сваю прадукцыю. Той жа «Белвест» назапасіў прадукцыю на зіму і працуе над асартыментам вясны-лета 2014 года. Такая тэндэнцыя ў нас на многіх прадпрыемствах існуе», - адзначыў першы намеснік старшыні канцэрна.

Ён не адмаўляў, што ёсць і праблемныя прадпрыемствы - «КІМ», «Камволь», «прадукцыя якіх досыць цяжка прадаецца».

Са слоў Місурагіна, канцэрн традыцыйна працуе з Мінгандлю па правядзенні распродажаў, сезонных скідак, сумесных рэкламных акцый з мэтай зніжэння складскіх запасаў.

Місурагін таксама паведаміў, што паводле вынікаў першага паўгоддзя індэкс фізічнага аб'ёму вытворчасці склаў 95,2% да ўзроўню мінулага года, рэнтабельнасць продажаў склала каля 10%, аб'ём экспарту павялічыўся на 10,5%, станоўчае сальда склала крыху больш за 100 млн даляраў.