Ярмошына патрабуе забароны байкоту «выбараў»

На нарадзе ў Лукашэнкі прапанавана ўвесці забарону на правядзенне агітацыі, якая накіраваная на зрыў «выбараў».

Адпаведныя змены абмяркоўваліся на нарадзе ў Лукашэнкі ў пытаннях удасканалення выбарчага заканадаўства, паведамляе яго прэс-служба.

Аб асноўных навінах законапраекта на нарадзе распавяла старшыня Цэнтральнай камісіі Беларусі па «выбарах» і правядзенні рэспубліканскіх рэферэндумаў Лідзія Ярмошына. Шэраг змяненняў тычацца пытанняў вядзення перадвыбарчай агітацыі і паляпшэння інфармаванасці выбаршчыкаў пры правядзенні «выбараў» усіх тыпаў.

Прапануецца ўвесці забарону на правядзенне агітацыі, якая накіраваная на зрыў «выбараў» і змяніць парадак фінансавання перадвыбарчай агітацыі кандыдатаў у прэзідэнты і дэпутаты.

Як адзначыла Лідзія Ярмошына, нават пры правядзенні «выбараў» у «парламент» ад насельніцтва пастаянна паступаюць скаргі, што яны не валодаюць інфармацыяй пра кандыдатаў. У сувязі з гэтым прапанавана адмовіцца ад бюджэтнага фінансавання агітацыйных расходаў кандыдатаў і перадаць гэтыя сродкі мясцовым тэрытарыяльным і акруговым выбаркамам, каб яны выраблялі інфармацыйныя буклеты і разам з запрашэннем наведаць выбарчы ўчастак рассылалі іх выбаршчыкам. «Такім чынам дзяржава паклапоціцца, каб кожны выбаршчык валодаў інфармацыяй па меншай меры аб тым, якія людзі абіраюцца па канкрэтнай выбарчай акрузе», - сказала кіраўніца ЦВК.

Пры гэтым за кандыдатамі ў дэпутаты і прэзідэнты будзе захаванае права на бясплатнае выкарыстанне дзяржаўных СМІ для перадвыбарных выступленняў, дэбатаў і апублікавання праграм. Кандыдатам у прэзідэнты і дэпутаты ўсіх узроўняў прадстаўляецца права стварэння асабістых фінансавых фондаў за кошт уласных сродкаў, а таксама сродкаў грамадзян і юрыдычных асоб. Такое права ў цяперашні час устаноўлена законам для кандыдатаў у дэпутаты «палаты прадстаўнікоў» і кандыдатаў у прэзідэнты.

У сувязі са спыненнем бюджэтнага фінансавання агітацыйных выдаткаў Лідзія Ярмошына прапанавала ў 5 разоў павялічыць гранічныя сумы фінансавых фондаў кандыдатаў у прэзідэнты - з 3 тыс. да 15 тыс. базавых велічынь, а кандыдатаў у «дэпутаты» «палаты прадстаўнікоў» - у тры разы да 3 тыс. базавых велічынь. Пры гэтым прапануецца, што грамадзянін, які зарэгістраваў сваю ініцыятыўную групу на прэзідэнцкіх выбарах, зможа адкрыць рахунак у банку для стварэння выбарчага фонду з моманту рэгістрацыі гэтай групы.

Асноўнымі дыскусійнымі пытаннямі на нарадзе сталі нормы аб змяненні парадку фінансавання выбарчых кампаній кандыдатаў.

У выніку Лукашэнка і астатнія ўдзельнікі нарады сышліся на тым, каб павысіць толькі максімальную суму выбарчых фондаў на прэзідэнцкіх выбарах у 3 разы. Акрамя таго, прынцыпова не аспрэчвалася прапанова аб тым, каб даць права стварэння такіх фондаў з моманту рэгістрацыі ініцыятыўнай групы.

«Што тычыцца эфірнага часу, трэба стварыць роўныя ўмовы для ўсіх. ЦВК прыме пастанову, па колькі хвілін кожнаму прадставіць», - адзначыў правадыр.

У сувязі з адыходам ад бюджэтнага фінансавання перадвыбарчай агітацыі мяркуецца, што кандыдаты ў дэпутаты мясцовых саветаў таксама атрымаюць права ствараць выбарчыя фонды ў суме да 30 базавых велічынь.

Са слоў Лідзіі Ярмошынай, у дапрацаваным варыянце законапраект да 30 жніўня будзе прадстаўлены Лукашэнку, а затым паступіць на разгляд у «парламент».

Нагадаем, раней кіраўніца ЦВК неаднаразова выказвалася супраць правядзення ўсякай дзейнасці, якая накіраваная на байкот «выбараў», і нават заяўляла, што гэта амаральна і безадказна.