Краіна і два яе прэм'ера

Прэм'ер-міністр Мясніковіч на прыёме ў Лукашэнкі і прэм'ер-міністр Мясніковіч на пасяджэнні Савета міністраў настолькі розныя людзі, што яны не знаёмыя паміж сабой.

Пазнаёмім, так.

Вось Міхаіл Мясніковіч на дакладзе ў Лукашэнкі, 19 ліпеня 2013 года:

«Мы зарабілі 101,4% валавога ўнутранага прадукту, але якасныя паказчыкі нядрэнныя, маецца і станоўчае сальда знешнегандлёвага балансу - плюс 303 мільёна. І досыць высокая ўдзельная вага інавацыйнай прадукцыі, што кажа пра тое, што пытанне мадэрнізацыі ажыццяўляецца дастаткова пісьменна. У чэрвені адбылося нязначнае зніжэнне складскіх запасаў - на 3%. Эканоміка краіны ў першым паўгоддзі гэтага года спрацавала на прыбытак».

Праходзіць 18 дзён і ўжо іншы Міхаіл Мясніковіч праводзіць пасяджэнне Савета міністраў:

…Прэм'ер-міністр раскрытыкаваў дзяржорганы за неэфектыўную работу па выкананні найважнейшых параметраў сацыяльна-эканамічнага развіцця краіны ў першым паўгоддзі. Мясніковіч адзначыў, што ўрад не можа далей мірыцца з бездапаможнасцю Мінпрама. Міністэрства падвергнулася крытыцы за падзенне экспарту і аб'ёмаў вытворчасці нароўні з ростам дэбіторскай і крэдыторскай запазычанасці прадпрыемстваў. Недастаткова эфектыўна вырашае праблемы разгрузкі складскіх запасаў. Не выконваюцца заданні па прыцягненню прамых замежных інвестыцый.

...Асобна прэм'ер-міністр спыніўся на праблемах развіцця «Беллегпрама». Акрамя дапушчанага спаду вытворчасці, невыканання заданняў па інвестыцыях, з-за неарганізаванасці і недастатковага прафесіяналізму кіраўніцтва і апарата канцэрна не забяспечана блаблабла.

Прэм'ер-міністр таксама вызначыў задачу па арганізацыі эфектыўнай работы галін у галіне інавацыйнага развіцця. На практыцы гэтыя сродкі часцяком выдаткоўваюцца не па прамым прызначэнні. «Было б не лішнім праверыць правільнасць расходавання сродкаў і праверыць праекты на адпаведнасць інавацыйнасці».

«...Прапанавана разгледзець пытанне аб прыцягненні да дысцыплінарнай адказнасці і адпаведнасцi займаемай пасадзе асобных намеснікаў міністраў, намеснікаў губернатараў і дырэктараў прадпрыемстваў».

Для таго, каб эканоміка зноў развівалася эфектыўна, прэм'ер-міністру тэрмінова трэба сустракацца з Лукашэнкам і як мага хутчэй, так!

Віктар Малішэўскі