Падатковай не даюць спакою грамадзяне, «якія жывуць не па сродках»

МПЗ Беларусі лічыць неабходным надзяліць падатковыя органы правам атрымання дадатковых звестак аб даходах фізічных асоб.

Пра гэта сёння паведаміў падчас брыфінгу міністр па падатках і зборах Уладзімір Палуян, перадае БелТА.

Міністр адзначыў, што ў мэтах выяўлення асоб, якія жывуць не па сродках, якія пры адсутнасці афіцыйных крыніц даходаў набываюць дарагую маёмасць - аўтамабілі, нерухомасць, зямельныя ўчасткі, падатковымі органамі праводзіцца праверка іх фінансавай заможнасці.

Так, у 2012 годзе праверана больш за 40 тыс. грамадзян, у бюджэт дадаткова паступіла Br20,5 млрд. У бягучым годзе такімі грамадзянамі ўжо ўнесена ў бюджэт звыш Br20 млрд.

«У мэтах павышэння выніковасці такой працы міністэрства ініцыявала ўнясенне змяненняў у Падатковы кодэкс аб надзяленні падатковых органаў правам атрымання звестак аб даходах фізічных асоб, якія складаюць банкаўскую таямніцу», - паведаміў Уладзімір Палуян.

Нагадаем, раней паведамлялася, што банкі краіны абавяжуць падаваць у падатковыя органы звесткi аб выдадзеных крэдытах фізічным асобам, а таксама аб налічаных адсотках па ўкладах. Адпаведная норма змяшчаецца ў законапраекце аб унясенні змяненняў у Падатковы кодэкс.