Беларусь трапіла ў кнігу Гінэса дзякуючы брытанскаму турысту (Відэа)

Брытанец Грэхам Х'юз наведаў усе дзяржавы свету.

Аб сваіх прыгодах ён зняў відэаролік, у якім кожнай з краін, а ўсяго іх 201, адведзена ўсяго толькі адная секунда. Беларусь у ім - на 59 секундзе. Брытанец называе нашу краіну, стоячы на дарозе.

Грэхам Х'юз трапіў у свежы выпуск Кнігі рэкордаў Гінэса як чалавек, які наведаў 201 дзяржаву свету, ні разу не скарыстаўшыся пры гэтым паслугамі авіякампаній. Яго дзіўная адысея пачалася ў студзені 2009 года і скончылася ў снежні 2012, піша блогер nyam-nyamki.

За гэты час ён выкарыстаў чатыры замежныя пашпарты, атрымаў не адзін дзясятак віз і распускаў пры гэтым не больш за 100 амерыканскіх даляраў у тыдзень.

Асаблівыя цяжкасці ў Х'юза здарыліся з наведваннем Расеі. Рэч у тым, што першы раз ён пабываў у гэтай краіне незаконна. Не маючы ў пашпарце візы, ён проста перайшоў уброд рэчку Нарва, пастаяў трохі на расейскім беразе і вярнуўся назад у Эстонію.

Аднак Кніга рэкордаў Гінэса адмовілася прымаць заяўку брытанца, улічваючы гэты факт. Выданне адзначыла, што нелегальная дзейнасць ім не заахвочваецца, таму Х’юзу давялося ў студзені 2013 года зноў наведаць Расею ўжо легальным спосабам - з візай у пашпарце прыбыць у Калінінград.

Сам Грэхам Х'юз кажа, што галоўнай мэтай яго адысеі стала жаданне даказаць чалавецтву, што падарожжа - гэта не так складана, як можа здавацца. І галоўнае ў гэтым працэсе - наяўнасць не грошай, а жадання.