Інтэрпол не шукае Керымава

Міжнародная арганізацыя атрымала ад Беларусі запыт на затрыманне саўладальніка «Уралкалію».

Пра гэта гаворыцца ў паведамленні, размешчаным на сайце арганізацыі.

«Генеральны сакратарыят Інтэрпола атрымаў 2 верасня запыт ад беларускіх уладаў аб унясенні ў «чырвоны спіс» расейца Сулеймана Керымава, а таксама чатырох топ-мэнэджэраў «Беларускай калійнай кампаніі». Па гэтых запытах працягваецца праца, аднак ніякага рашэння аб унясенні гэтых асоб у «чырвоны спіс» на дадзены момант не прынята», - гаворыцца ў паведамленні.

Нагадаем, 3 верасня МУС Беларусі аб'явіла, што Інтэрпол прыняў рашэнне абвясціць асноўнага акцыянера «Уралкалію» ў міжнародны вышук.

Днём раней Следчы камітэт Беларусі паведаміў, што Сулейман Керымаў з'яўляецца абвінавачаным па крымінальнай справе ў дачыненні да службовых асоб ЗАТ «БКК». Вынесеныя пастановы аб ужыванні да яго меры стрымання ў выглядзе заключэння пад варту і абвяшчэнні яго ў вышук, у тым ліку па лініі Інтэрпола. Дзеянні Керымава кваліфікаваныя следствам як арганізацыя злоўжыванні ўладай і службовымі паўнамоцтвамі (п.4 арт.16 і ч.3 арт.424 Крымінальнага кодэкса Рэспублікі Беларусь). Максімальная санкцыя артыкула прадугледжвае пакаранне ў выглядзе пазбаўлення волі на тэрмін да 10 гадоў з канфіскацыяй маёмасці, заявілі ў СК Беларусі.

Фота: Коммерсант