Як пратэстуюць польскія прафсаюзы (Відэа)

У Варшаве завяршыўся першы з чатырох дзён сацыяльнага пратэсту.

25 тысяч чалавек з усёй Польшчы пратэставалі супраць змяненняў у пенсійным заканадаўстве, якія павышаюць пенсійны ўзрост да 67 гадоў. Групы пратэстоўцаў з іншых гарадоў прыехалі ў польскую сталіцу на аўтобусах, якіх было больш за 200. Мітынгоўцы c транспарантамі, сцягамі, сірэнамі, свісткамі і гукаўзмацняльнай апаратурай сабраліся ў розных частках Варшавы і накіраваліся да Сейма. У сувязі з гэтым рух транспарту на многіх вуліцах быў паралізаваны.

Па дарозе да парламента дэманстранты стваралі гул пры дапамозе свісткоў і дудак, а таксама палілі фаеры, дымавыя шашкі, ляльку міністра транспарту Славаміра Новака. Гэта выглядала вельмі эфектна. Шэсце суправаджалася лозунгамі: «Не хочам працаваць за грошы», «Не пенсійнай рэформе!» і многімі іншымі. Пратэстоўцы сустрэліся каля будынка Сейма, дзе адбыўся мітынг. Падчас яго людзі запатрабавалі сустрэчы з прэм'ер-міністрам Дональдам Тускам, які так і не выйшаў да мітынгоўцаў. У адказ на гэта ўдзельнікі пратэстаў падпалілі аўтамабільную покрыўку.

На дадзены момант рух транспарту па асноўных вуліцах адноўлены. Асноўная маса дэманстрантаў разышлася, але некаторыя засталіся пікетаваць Сейм да апошняга дня пратэстаў - суботы. У гэты дзень арганізатары акцыі разлічваюць сабраць 65 тысяч чалавек, паведамляе Gazeta.pl (пераклад charter97.org).

Нагадаем, чатырохдзённая акцыя «Пенсійны пратэст» пачалася з-за нязгоды з працоўным заканадаўствам. У прыватнасці, як паказаў кіраўнік Усепольскага аб'яднання прафсаюзаў Ян Гуз, яны патрабуюць адмовіцца ад пенсійнай рэформы, якая павышае ўзрост выхаду на пенсію да 67 гадоў.

Ва ўрадзе гэта тлумачаць жаданнем падняць узровень пенсій. Па словах міністра працы Польшчы Уладзіслава Касіняк-Камыша, гэта звязана з дэмаграфічнай сітуацыяй у рэспубліцы.

Прадстаўнікі прафсаюзаў да лета абмяркоўвалі з урадам планы рэформаў. Перамовы сарваліся пасля таго, як улады мадыфікавалі працоўнае заканадаўства і далі працадаўцам больш свабоды ў фармаванні графіка працы. Пасля гэтага некаторыя прафсаюзныя дзеячы запатрабавалі адстаўкі ўраду Дональда Туска. Прэм'ер, у сваю чаргу, абвінаваціў у зрыве перамоваў саміх прафсаюзных дзеячаў.

Варта адзначыць, што зусім нядаўна заканадаўства аб працоўных пенсіях было зменена ў Беларусі. Згодна з указам Лукашэнкі №389 ад 3 верасня 2013 года, працоўная пенсія будзе налічвацца толькі тым грамадзянам, якія плацілі ўнёскі ў фонд сацыяльнай абароны больш за 10 гадоў, замест ранейшых пяці.