Азаранка пачне тэнісны турнір у Токіо з другога раўнда
7- 20.09.2013, 16:57
- 8,253
Лепшая беларуская тэнісістка, другі нумар сусветнага рэйтынгу Вікторыя Азаранка пачне выступленне на турніры ў Токіо з другога круга.
Беларуска, якая атрымала другі нумар пасеву, пасля адмовы першай ракеткі планеты амерыканкі Серэны Уільямс будзе сапернічаць з пераможцай стартавага паядынку паміж старэйшай з сясцёр Уільямс - Венус (62-і нумар сусветнага рэйтынгу) і нямецкай тэнісісткай Монай Бартэль (34), паведамляе БелТА.
Акрамя Серэны Уільямс, якая знялася з турніру з-за назапашанай стомленасці, у Токіо не будзе трэцяга нумара рэйтынгу ВТА расеянкі Марыі Шарапавай, якая яшчэ не аднавілася пасля траўмы пляча. У 2005 і 2009 гадах Марыя Шарапава была пераможцай турніру ў Токіо.
На спаборніцтвах у японскай сталіцы 24-гадовая Вікторыя Азаранка выступіць у пяты раз. Двойчы - у 2010 і 2011 гадах - яна даходзіла да паўфіналу, а ў 2009 і 2012 гадах саступала ў чвэрцьфінальных паядынках.
У мінулым годзе пераможцай стала расейская тэнісістка Надзея Пятрова, якая абыграла ў вырашальным паядынку польку Агнешку Радваньску.
Цяперашні турнір пачнецца ў Токіо 22 верасня, а фінішуе 28 верасня. У гэтым годзе яго прызавы фонд складае $2 млн. 369 тыс. Пераможца адзіночнага разраду атрымае ў якасці прызавых $426 тыс. і 900 рэйтынгавых ачкоў.