Літоўскі міністр: Аб Беларускай АЭС па-ранейшаму няма інфармацыі

Літва, якая ўжо больш за тры месяцы запытвае дадатковую інфармацыю пра Беларускую АЭС у Астраўцы, да гэтага часу яе не атрымала.

Міністр у пытаннях навакольнага асяроддзя Валянцінас Мазураніс кажа, што Беларусь не толькі не дае важную інфармацыю, але і абвінавачвае Літву ў спробах зацягнуць працэс - таму міністэрства апублікавала атрыманыя на гэты дзень адказы, паведамляе ru.Delfi.lt.

«Мы цяпер вывесілі адказы Беларусі ў адносінах да Астраўца, бо яны сцвярджаюць, што мы цягнем час і не пачынаем кансультацыі. Так што мы далі магчымасць грамадскасці азнаёміцца з адказамі і дапоўнілі іх сваім каментаром, што ўсё яшчэ не хапае важнай інфармацыі», - сказаў Мазураніс.

З ягоных слоў, сітуацыя з падрыхтоўкай ацэнкі аб уздзеянні АЭС на навакольнае асяроддзе, за тры месяцы па сутнасці не змянілася - Літва не атрымлівае запытанай дадатковай інфармацыі.

«Мы ўжо інфармавалі, што калі атрымаем дадатковую інфармацыю і прааналізуем яе, будзем гатовыя правесці абмеркаванне ў Вільні», - сказаў міністр. З ягоных слоў, хоць Беларусь у жніўні задаволіла абмеркаванне ў Астраўцы, яно не адпавядала Канвенцыі Эспоо.

У чэрвені Літва атрымала адказы Беларусі адносна АЭС у Астраўцы, аднак яны, на думку Міністэрства у пытаннях навакольнага асяроддзя, не былі цалкам грунтоўнымі, таму была запытаная дадатковая інфармацыя.

Літоўскія службовыя асобы сцвярджаюць, што не атрымліваюць адказы з Менска на пытанні, чаму для АЭС была абраная менавіта Астравецкая пляцоўка, якая знаходзіцца ўсяго ў 50 км ад сталіцы Літвы Вільні. Няма таксама адказу і на пытанне, чаму Беларусь не праводзіць сейсмалагічныя даследаванні - бо ў гэтым месцы былі зафіксаваныя моцныя землятрусы.