Еўрапейскія інтэрнэт-піраты аб'ядналіся ў адзіную партыю

Удзельнікі канферэнцыі пірацкіх партый, якая прайшла ў Люксембургу, заявілі пра стварэнне аб'яднанай Пірацкай партыі Еўропы.

Дакумент аб утварэнні новага палітычнага аб'яднання падпісалі прадстаўнікі «пірацкіх» партый Германіі, Швецыі, Фінляндыі, Люксембурга, Нарвегіі, Францыі і іншых краін. Дзякуючы рашэнню заснавальнікаў не абмяжоўваць колькасць удзельнікаў пагаднення краінамі Еўразвяза, далучыцца да Пірацкай партыі Еўропы змаглі і члены расейскага пірацкага руху. Усяго свой подпіс пад маніфестам аб стварэнні партыі паставілі піраты чатырнаццаці краін, піша Lenta.ru.

Маніфест партыі быў падрыхтаваны яшчэ ў канцы ліпені 2013 года з тым, каб ва ўсіх будучых членаў арганізацыі быў час азнаёміцца з дакументам і абмеркаваць яго. Як сказана ў маніфесце, асноўнымі напрамкамі працы новай партыі стануць барацьба за празрыстасць дзейнасці органаў дзяржаўнай улады і рэформа аўтарскага права ў ЕЗ.

Яшчэ адной з мэтаў стварэння адзінай еўрапейскай структуры, якая прадстаўляе інтарэсы «пірацкай» супольнасці, з'яўляецца падрыхтоўка да выбараў у Еўрапарламент. На маючыя адбыцца ў 2014 годзе выбары еўрапейскія піраты маюць намер ісці адзіным блокам, каб павялічыць уласныя шанцы на атрыманне месцаў у парламенце. Рашэнне аб гэтым было прынята яшчэ на з'ездзе «Інтэрнацыяналу Пірацкіх партый», які прайшоў у 2012 годзе ў Празе.

Першая пірацкая партыя ў Еўропе (Piratpartiet) была заснаваная ў Швецыі ў студзені 2006 года. Ідэя яе стварэння належыць палітыку і прадпрымальніку Рыку Фальквінге (Rick Falkvinge). Па выніках выбараў 2009 года Пірацкая партыя Швецыі атрымала на галасаванні рэкордныя для сябе 7,1 адсотка галасоў. Гэта дазволіла ёй заняць два месцы ў Еўрапарламенце. Усяго ў галоўным заканадаўчым органе Еўропы засядае 754 дэпутата.

Фота: Gero Breloer / AP