Беларусь зняла забарону з прадукцыі Fonterra
2- 6.09.2013, 13:10
- 8,470
Беларусь следам за Расеяй дазволіла ўвоз малочнай прадукцыі новазеландскай кампаніі.
Пра гэта паведамілі ў міністэрстве аховы здароўя Беларусі, перадае «Інтэрфакс».
Сёння Расспажыўнагляд зняў часовыя абмежаванні на пастаўкі новазеландскай малочнай прадукцыі, што вырабляецца кампаніяй Fonterra.
«Адпаведная інфармацыя накіраваная ў Федэральную мытную службу і ўпраўленні Расспажыўнагляду па суб'ектах Расейскай Федэрацыі», - гаворыцца ў паведамленні на сайце Расспажыўнагляда.
Па звестках ведамства, пры правядзенні дадатковых даследаванняў малочнай прадукцыі было ўстаноўлена, што выяўленая бактэрыя не з’яўляецца ўзбуджальнікам батулізму.
«Пры правядзенні дадатковых даследаванняў устаноўлена, што бактэрыя, выяўленая ў бялкова-сыраватачным канцэнтраце (WPC80) вытворчасці кампаніі Fonterra, не з’яўляецца Clostridium botulinum, а адносіцца да ўмоўна-патагенных мікраарганізмаў Clostridium sporogenes, якая не прадуцыруе батулінічны таксін», - удакладнілі ў Расспажыўнаглядзе.
Раней Беларусь следам за Расеяй абмежавала ўвоз прадукцыі новазеландскай кампаніі Fonterra . Разам з тым, у беларускім Міністэрстве аховы здароўя адзначалі, што афіцыйна прадукцыя кампаніі ў Беларусь не пастаўлялася.