Цягнібок распавёў дэталі перамоваў з Януковічам
29- 28.01.2014, 16:26
- 4,195
Віктар Януковіч абяцаў апазіцыі, што сфармуе склад новага ўрада на працягу тыдня.
Пра гэта сказаў лідар ВА "Свабода" Алег Цягнібок журналістам, перадае УНІАН.
"Калі ў панядзелак уздымалася гэтае пытанне, то гучаў тэрмін да аднаго тыдня - пытанне стварэння новага ўрада", - сказаў Цягнібок.
Паводле яго слоў, прэзідэнт вымушаны будзе падпісаць указ аб адстаўцы Мікалая Азарава з пасады прэм'ера.
"Калі ён не падпіша, тады перакрэсліваецца ўся схема (дамоўленасцей - рэд.). Тады ўсё перакрэсліваецца і вяртаецца назад", - сказаў Цягнібок.
Ён мяркуе, што Януковіч "пакуль не падпісвае, таму што ў яго ёсць пэўныя жаданні дамаўляцца, гаварыць".
"Я так разумею, што яму патрэбная кандыдатура новага кіраўніка ўрада", - сказаў Цягнібок.
Ён выказаў здагадку, што прэзідэнт хоча адначасова з указам аб адстаўцы ўрада даць прапанову на прызначэнне новага прэм'ер-міністра.
Цягнібок адзначыў, што падчас сустрэчы з апазіцыяй гаварылася таксама пра тое, што трэба мяняць не толькі ўрад, але і сістэму ўлады.
Ён нагадаў, што прэзідэнт прапаноўваў апазіцыі сфармаваць урад і ўзяць на сябе адказнасць.
"Прэзідэнт сказаў: вы ж не згодныя на тое, што я забіраю Азарава і прызначаю Арбузава, Клюева прызначаю. Якая розніца? Урад такі ж. Тая ж група людзей. Таму я кажу - бярыце на сябе адказнасць", - распавёў Цягнібок.
Ён адзначыў, што было прапанавана два варыянты: альбо апазіцыя бярэ на сябе поўную адказнасць, альбо ствараецца кааліцыйны ўрад.
Цягнібок распавёў, што Януковіч прапанаваў Яцанюку пасаду прэм'ера, для рэалізацыі еўраінтэграцыі.
"Маўляў, вы ж мяне крытыкавалі, што я заваліў еўраінтэграцыйны кірунак. Прашу вельмі - ты будзеш прызначаны прэм'ерам, вось і рэалізоўвай еўраінтэграцыю", - пераказаў Цягнібок.
На думку Цягнібока, Януковіч хоча завяршыць еўраінтэграцыю "рукамі апазіцыі".
Свабодавец патлумачыў, што апазіцыя "трапіла ў нажніцы", так як адмова ад адказнасці пагоршыць міжнароднае становішча краіны.
"І Амерыка, і Еўропа на гэтым настойваюць - на фармаванні нейкага кааліцыйнага ўрада. Яны лічаць, што гэта выхад з сітуацыі", - растлумачыў ён.
"З іншага боку, з якой радасці мы будзем прымаць сумесную адказнасць за ўсё, што робіцца ў дзяржаве. Вы зразумееце, што значыць зараз ісці працаваць ва ўрад, пры тым, што дзяржава фактычна ў дэфолце, казна пустая?", - сказаў Цягнібок.
Паводле яго слоў, ён не бачыць логікі ісці ва ўрад толькі для таго, каб "займаць кабінет".
Цягнібок падкрэсліў, што перамоўны працэс паміж уладай і апазіцыяй працягваецца.