Шосты дзень у Беларусі шукаюць зніклага салдата

Інфармацыя пра тое, што хлопца нібыта знайшлі на дыскатэцы ў суседняй вёсцы, не пацвердзілася.

З двух гадзін ночы 3 студзеня і па сённяшні дзень няма ніякіх вестак пра салдата тэрміновай службы, які знік з брыгады спецназу ў Мар'інай Горцы. Нагадаем, 21-гадовы Аляксандр Сушчык з Мазыра прапаў падчас нараду са штык-нажом і рацыяй.

На некаторых інтэрнэт-рэсурсах з'яўлялася інфармацыя без спасылак на якую-небудзь крыніцу аб тым, што хлопец нібыта знойдзены ў суседняй вёсцы: маўляў, напіўся і пайшоў у самаволку, каб пацешыцца на дыскатэцы. Аднак гэта не так, і адкуль пайшла дэзінфармацыя, невядома. Бацькі хлопца і пошукавікі-валанцёры пацвярджаюць, што на след салдата да гэтага часу не выйшлі, піша «Комсомольская правда в Беларуси».

Мінабароны пакуль не інфармуе пра абставіны знікнення салдата і пошукі. Пакуль вядома толькі, па неафіцыйнай інфармацыі, пра тое, што на тэрыторыі часткі знойдзены штык-нож і рацыя, з якімі сышоў салдат.

Тым часам у сацыяльных сетках пішуць, што бачылі самотнага салдата то на трасе, то ў краме, але канкрэтыкі пакуль ніякай.