Шайгу распавёў аб тэрмінах размяшчэння войскаў РФ у Арктыцы
37- 21.10.2014, 21:50
- 22,840
Ужо ў 2014 годзе расейскія войскі будуць размешчаныя па ўсім Арктычным поясе.
Пра гэта паведамляе РІА «Новости» са спасылкай на міністра абароны Сяргея Шайгу.
«Мы даволі актыўна пайшлі ў Арктыку, і ўжо ў гэтым годзе ў нас з'явіцца вялікая частка нашых падраздзяленняў па ўсім арктычным поясе - фактычна, ад Мурманска да Чукоткі», - заявіў у аўторак міністр абароны Сяргей Шайгу на пасяджэнні калегіі вайсковага ведамства.
Для кіравання сіламі і сродкамі ў арктычнай зоне на базе Паўночнага флота ствараецца асобнае аператыўна-стратэгічнае камандаванне «Поўнач». Яно будзе канчаткова сфарміраванае да 2017 года. У склад камандавання ўвойдуць, у прыватнасці, спецыяльна абсталяваныя і навучаныя арктычныя брыгады.
У красавіку 2014 прэзідэнт Расеі Уладзімір Пуцін абвясціў аб стварэнні ў расейскай частцы Арктыкі адзінай сістэмы базіравання надводных караблёў і падлодак новага пакалення. Паводле ягоных слоў, таксама трэба павысіць надзейнасць аховы расейскай мяжы ў Арктыцы, у тым ліку за кошт узмацнення марскога складніка памежнай групоўкі.
Як раней паведамляла ў сваім дакладзе МНС РФ, агульны кошт карысных выкапняў, засяроджаных у арктычным рэгіёне Расеі, перавышае 30 трыльёнаў даляраў. Паступова цэнтр цяжару нафтагазаздабычы Расеі будзе перамяшчацца на шэльф арктычных мораў, лічаць спецыялісты міністэрства. Як раней адзначалася ў некаторых даследаваннях, у Арктыцы засяроджана да 30 працэнтаў сусветных запасаў газу і 13 працэнтаў - нафты.