Падатковая ўзяла пад прыцэл інтэрнэт-гандаль

Падатковыя ўстановы заняліся праверкамі інтэрнэт-крам.

Падатковыя ўстановы аналізуюць інфармацыю, размешчаную на форумах, у сацсетках і іншых інтэрнэт-пляцоўках, каб выявіць асоб, якія вядуць незаконную дзейнасць, і накіраваць да іх раптоўную праверку. Пра гэта распавялі прадстаўнікі МПЗ Беларусі на прэс-канферэнцыі «Кантрольная дзейнасць падатковых органаў Беларусі, накіраваная на скарачэнне ценявога абароту», піша «Ежедневник».

Ні для каго не сакрэт, што ў сферы інтэрнэт-гандлю актыўна выкарыстоўваецца аплата тавару гатоўкай, што дазваляе некаторым работнікам весці рэалізацыю тавару без адлюстравання ў бухгалтарскім уліку. Падатковая адсочвае гэта, а таксама актыўна выяўляе рэалізацыю шэрых тавараў, якія нелегальна ўвозяцца ў нашу краіну.

«Распаўсюджаныя схемы ўхілення ценявых структур ад выплаты падаткаў - гэта ўцягванне тавараў у ценявы абарот; вядзенне незаконнай прадпрымальніцкай дзейнасці, звязанай з залучанымі ў ценявы абарот таварамі; не прыняцце тавару па бухгалтарскаму ўліку, а таксама вядзенне рэалізацыі тавару за гатоўку без адлюстравання ў бухгалтарскім уліку. Канфіскацыя з ценявога абароту часцяком звязаная з парушэннем суб'ектамі гаспадарання парадку набыцця, захоўвання, выкарыстання ў вытворчасці і транспартаванні тавару. Сюды ж можна аднесці парушэнне парадку маркавання», - сказаў Міхаіл Махтадуй, намеснік начальніка ўпраўлення арганізацыі праверак і кантролю сеткі інтэрнэт Міністэрства падаткаў і збораў Рэспублікі Беларусь.

Усяго, паводле інфармацыі МПЗ, за перыяд са студзеня да кастрычніка гэтага года падатковыя ўстановы адсачылі праз інтэрнэт і накіравалі пазапланавыя праверкі да 800 прадаўцам. У выніку з ценявога абароту канфіскавана таварна-матэрыяльных каштоўнасцяў і грашовых сродкаў на суму блізу 70 млрд рублёў. Са слоў Махтадуя, у параўнанні з 2013 годам эфектыўнасць праверкі законнасці ажыццяўлення гандлю праз інтэрнэт падатковымі органамі павялічылася ў 2,4 разы.