«Уралкалій» не збіраецца аднаўляць партнёрства з Беларуссю
- 17.11.2014, 10:03
- 4,513
Беларусь адкрыта да дыялогу з «Уралкаліем», аднак пакуль не атрымлівала ад яго канкрэтнай прапановы ў аднаўленні партнёрства.
Пра гэта заявіў міністр эканомікі краіны Мікалай Снапкоў у інтэрв'ю Bloomberg, піша «Інтэрфакс».
У канцы кастрычніка першы віцэ-прэм'ер Беларусі Уладзімір Сямашка казаў, што не бачыць перспектыў хуткага аднаўлення супрацоўніцтва «Беларуськалія» і «Уралкалія».
У сярэдзіне верасня гендырэктар «Уралкалія» Зміцер Осіпаў казаў, што кампанія пакуль не плануе аднаўляць партнёрства з Беларуссю ў продажы калійных угнаенняў. Ён заяўляў, што ніякіх перамоваў з красавіка ў гэтым пытанні з беларускім бокам не было, цяпер іх таксама няма і новых сустрэч не запланавана.
У красавіку на сустрэчы з адным з асноўных акцыянераў «Уралкалія» Дзмітрыем Мазепін Лукашэнка прапанаваў вызначыць шляхі далейшага супрацоўніцтва дзвюх калійных вытворцаў.
У сакавіку гендырэктар «Онэксіма» (найбуйнейшы акцыянер «Уралкалія») Дзмітрый Разумаў заяўляў, што аднаўленне трэйдынгавага партнёрства з «Беларуськаліем» было б выгадна абодвум вытворцам. Крыніцы, знаёмыя з сітуацыяй, паведамлялі, што «Уралкалій» хоча атрымаць кантрольны пакет (блізу 65%) у статутным капітале новага сумеснага трэйдара і прапануе зарэгістраваць яго ў Маскве.
«Уралкалій» і «Беларуськалій» з 2005 года прадавалі калійныя ўгнаенні праз зарэгістраваную ў Менску «Беларускую калійную кампанію» (БКК), якая была створана на парытэтных пачатках. Паралельна бакі абмяркоўвалі стварэнне новага сумеснага трэйдара ў Швейцарыі - Soyuzkali GmbH («Саюзкалій»).
Аднак у ліпені мінулага года «Уралкалій» заявіў аб адмове ад экспарту праз БКК і аб пераходзе да стратэгіі «аб'ёмы вышэй за кошты», аргументуючы гэта парушэннем беларускім бокам умоў працы ў рамках СП. Распад БКК, разам з іншымі фактарамі, пацягнуў уніз сусветныя каціроўкі хлоркалію, аднак з пачатку гэтага года кошты сталі паступова аднаўляцца.