Сяргей Крывец: Трэба пасля сябе пакінуць вынік

Лепшы футбаліст Беларусі 2014 Сяргей Крывец выказаў меркаванне пра сітуацыю ў нацыянальнай зборнай.

Сяргей Крывец даў інтэрв'ю журналісту "Прессбола".

- Давайце пра набалелае - пра зборную. Аляксандр Хацкевіч - галоўны трэнер. Якія думкі на гэты конт?

- Гэта тое прызначэнне, якое прагназавалі. Усе чакалі прыходу Аляксандра Хацкевіча - так і выйшла. Ну, ужо добра. Цяпер усё будзе залежаць ад таго, як спрацуемся. Гэта задача і гульцоў, і трэнерскага штаба. трэба знайсці камандную "хімію". І пастарацца стварыць нешта цікавае. Каб не было сорамна, каб кожны матч быў святам, каб заўзятары вярнуліся на трыбуны.

- Сумныя факты - зборная вывалілася з першай сотні сусветнага рэйтынгу.

- Гэты рэйтынг не заўсёды аб'ектыўны. Як па мне, увагу трэба звяртаць на іншае - на ўдзел у топ-турнірах. Вось галоўны стымул і галоўная мэта. У апошні час сустракаю шмат каментароў - маўляў, сённяшняе пакаленне футбалістаў слабое, вось раней былі майстры ... Але мы ж і раней нікуды не выходзілі! Ні дзесяць, ні пятнаццаць гадоў таму. І ўсе гэтыя размовы бессэнсоўныя. Крытэр адзін - вынік. Яго няма. Не можа зборная Беларусі патрапіць на вялікі турнір. Значыць, трэба перастаць гаварыць і пачаць працаваць. І абавязкова - аб'яднацца. Толькі тады нешта можа атрымацца.

- Кранаюць вас меркаванні пра розніцу пакаленняў?

- Непрыемна, вядома. Праз дзесяць гадоў я што, таксама буду сядзець і філасофстваваць: ой, сёння не тое, вось у наш час?.. Вынік трэба пасля сябе пакінуць. Астатняе - пустыя размовы.